收起粗金鏈 素服行排檔 八両金父子茶記免費借廁所

  64歲嘅八両金(原名葉競生),其83歲母親上月猝死,本來兩母子嘅生日月變成喪禮,侍母至孝嘅八両金現正努力撫平哀痛。日前下午,八両金收起平日愛戴嘅幾抽金鏈,同搽唇膏嘅「八両仔」葉小霆全身黑色素服遊走灣仔。二人全程愁眉苦臉去揀平嘢,見人父喺排檔買咗條廿蚊老翻名牌內褲,馬上塞入褲袋,然後再雙雙行去茶記借廁所。方便完,孝子食番啖雪茄,繼續好愁! 採訪:李維隆

  上月中本來係八両金64歲牛一,亦係其母生日月,誰知生日會變成喪禮,孝子喺殯儀館仰天嚎哭,大喊「媽咪啊!」孝感動天,還望八両金媽媽一路好走。

速買A貨底褲

  日前下午,喪母都要堅強生活嘅八両金,帶阿仔穿上全身黑色行灣仔。平日鍾意戴幾抽金鏈嘅佢,當日收起「至愛」,齋戴隻金錶現身。兩父子去灣仔街市附近睇平價皮帶,三、四十蚊有一條,八両金揀咗幾分鐘,面帶愁容離開。之後二人轉攻太源街排檔,面燶燶嘅八両金帶阿仔迫入排檔睇衫,望幾望,再睇另一間,最終喺一檔買咗條A貨底褲,畀張廿蚊,就將底底塞入褲袋走人。其後,兩父子行咗去軒尼詩道一間茶記免費借廁所。如廁後,八両金滿懷心事拎支雪茄出嚟食,一邊歎一邊撩鼻,等埋乖仔出嚟才雙雙離開。


hd