丈夫會呷醋 癡戀「小Oppa」多過型老公 呂慧儀行街密密咀3歲仔

        35歲嘅長腳蟹呂慧儀,14年8月為丈夫黃文迪誕下B仔柏翹(Anton)後,人母樂於開心湊仔。3歲半「蟹籽」唔經唔覺讀K1,人母愈嚟愈迷戀長腿baby,形容自己似足女生迷戀韓星,又成日話阿仔係愛人,搞到老公勁呷醋喎!日前下午,長腳蟹一家三口玩轉中環AIA嘉年華,其後再行ifc超市買嘢食醫肚。見人母行超市成日咀嘴「小Oppa」,真係個快樂港媽。

        呂慧儀自從做咗媽咪後,成日將寶貝仔掛喺口邊,又讚阿仔已超越老公靚仔多倍,又話同阿仔拍拖多過老公,阿仔先係愛人喎!o依家佢拍緊無線處境劇《愛.回家之開心速遞》,一星期有三日可回家湊「蟹籽」,長腳蟹好enjoy話︰「我朝早仲可以送埋個仔返學先返工,收工又趕到返去同佢食飯。」仲同囝囝溫馨追劇,「囝囝一見到片頭就嗌媽咪,而且佢好霸道,唔准我同爹哋傾計同錫錫,只可以錫晒佢。」所以現階段未必會再生!

「阿仔先係愛人」

  日前周日下午,長腳蟹一家三口去嘉年華過family day。當日星媽帶「小Oppa」坐吓車車、玩充氣樂園等,再睇埋雜技團,同場仲撞見另一星媽謝安琪和其十歲仔瞻瞻O添。玩咗幾個鐘,「放晒電」嘅Anton超攰,就由健身教練老竇抱抱,然後一家人行去ifc city'super買小食。人妻喺熟食櫃位兜咗個圈,好快就揀中炸魚塊,其大隻老公一直抱仔跟實,最後揀多兩支drinks就畀錢離開。見「小Oppa」好得意,表情豐富,摟住daddy又想飛身撲向媽咪,「蟹籽媽」因雙手拎住小王子件褸及食物,無暇抱仔,唯有kiss啖「前世情人」安慰吓啦!一啖唔夠,再錫多啖,溫馨到爆!

採訪 ︰ 張詠森

hd