《無間道》秘聞 嘉良哥私授做奸秘技 羅仲謙:「唔夠瞓」演黑警

  一睹偶像風采,已經唔容易,仲要同偶像合作,更加係所有人夢想,最近在劇集版《無間道》,羅仲謙就有幸同兒時偶像羅嘉良(撈家)合作,原來兩人不但同姓兼係客家人,而且謙仔老婆楊怡仲同嘉良好有緣。難怪兩人甫合作就一見如故,大家會不時摸住酒杯底傾吓世界外,最難得是撈家這個前輩會經常提點謙仔,謙仔更自爆撈家點樣用電眼演戲,還親自教了他不少秘技,搞到謙仔每日開完工,都返屋企同老婆仔楊怡分享,開心到差啲瞓唔着。

撈家和謙仔都承認,今次接拍只因對《無間道》這個品牌有信心,加上對監製梁家樹以及製作團隊信任,不過謙仔就多了個重要原因,就是可以跟偶像羅嘉良合作,「細個已經好鍾意睇嘉良哥做戲,好似《天地豪情》、《天地男兒》同埋Mrs. Diana《先生貴性》咁,所以諗都唔使諗就答應演出啦!」

羅氏宗親做大官

  能夠夢想成真同偶像合作,謙仔事前都有向同撈家合作過的老婆楊怡取經攞定料,「阿怡同嘉良哥都好有緣㗎!(撈家:我哋合作過《衛斯理》嘛!)唔單止,佢話你有次頒獎禮攞視帝,係佢拖你出嚟㗎!」撈家想了想,「應該唔係第一次攞獎,第一次冇人拖,應該係第二、三次。」謙仔補充,「估唔到咁樣兜個圈,我哋又會有機會合作。同埋我同嘉良哥同姓三分親,仲要大家都係客家人嘛!(有冇查下族譜?)嘉良哥話我哋祖先係做大官㗎!」撈家說:「係幫皇帝手㗎!」

為角色捱眼瞓

  講到合作時,謙仔更加興奮,「嘩!嘉良哥啲眼神真係好勁,佢帶咗眼鏡啲眼神更加深沉難測,我成日唔使埋位都喺度睇佢做戲,好似有場講佢同鴻哥(郭政鴻)對鬧嘅戲,我同王陽睇通告知道專登喺度等睇呢場戲。」撈家都認同帶眼鏡造型真係幫到手,「做奸角係好玩好多,但造型真係好重要,好多謝Tommy(梁家樹)諗到呢個造型,個眼鏡真係令到觀眾唔係咁易睇得透『韓朗』嘅內心。」謙仔除了做觀眾,最開心當然是獲偶像親自提點,「一開頭嘉良哥已經有提點我,佢話我對眼天生太大,做今次呢個角色唔係太適合,要搵方法令佢感覺混濁啲先得。」撈家說:「佢對眼太黑白分明,做正義警察就無問題,但今次呢個係黑警就唔係咁啱。」謙仔說:「後尾我索性專登瞓少啲,咁對眼會冇咁大,因為我個角色係無理由有一日瞓得好嘅。」

撰文:杜淑霞

攝影:謝民光

髮型:Jacky Leung@IL Colpo(PP)(羅仲謙)

化妝:Leo Tam@Annie G Chan(羅仲謙)

服裝:KOYO Jeans(羅仲謙)

場地:香港帝苑酒店

hd