整情人節蛋糕觸景傷情 林欣彤拍拖唔會再忍

  最近林欣彤(Mag)有新歌面世,講到明要在情人節推出,以為幾咁甜蜜,皆因她更約本報一齊學整情人節蛋糕。點知呢個「北海道牛乳草莓海綿蛋糕」外觀同味道都夠晒甜,不過Mag首新歌竟然叫《忍》,仲係講有第三者畀仔飛嗰種,自爆恨拍拖的Mag,都話有啲觸景傷情,不過亦學精咗以後唔會再啞忍啲衰男人喎!         採訪:杜淑霞

  場地:AMAZING SWEETS  髮型:Terry Yeung @Hair Corner

  小學時Mag突然好鍾意整嘢食,試過整鹹味蛋糕畀屋企人嘆,「嗰時啲超巿貨品冇咁齊,搵唔到無鹽牛油,咪照用有鹽牛油,所以做咗出嚟鹹鹹哋好怪。」之後Mag有上家政堂,更加覺得整嘢食唔易,「都試過專登煲個雞湯整麵畀男朋友食,但蛋糕真係未試過。」呢日Mag跟Winnie老師學整蛋糕,尚算有板有眼,「都幾好玩,最開心成功整到裏面個心。」

  不過Mag今年冇對象送蛋糕,情人節當日仲要忙宣傳新歌《忍》,Mag話揀呢日派歌唔係想攞景,反而為一班單身嘅朋友打氣,感情事寧缺勿濫,「好多謝林夕幫我填啲咁好嘅歌詞,首歌講一段關係裏面,好多時會搞到人迷失自己,成日要忍氣吞聲。我自己都試過,所以錄完聽番自己都有喊,但亦都會提醒自己,再拍拖嘅話唔可以再失去自己,唔可以忍。」


hd