忙個唱捱到入廠 黎瑞恩邀前夫家人睇Show

  44歲的黎瑞恩(小恩子)強勢回歸樂壇,推出充滿正能量新歌《剩下光年》外,更於4月5及6日在紅館舉行《感恩有你演唱會2018》。小恩子早前發現胰臟有兩個良性瘤,做手術切除後又為個唱節食減肥,加上連續兩星期日跑10個通告做宣傳,終於患上乙型流感『入廠』,她聲音沙啞說:「我好病,手上嘅工作都停晒,之前仲以為可以撐得住!」不過,當諗到有一班Fans支持自己,小恩子既感恩又感動,付出總算值得!採訪:方騫平

攝影:李維隆 化妝:Meegan Seak 髮型:Sev / John @ Hair Culture 場地:LE CREUSET

  相隔16年再於紅館開Show,小恩子覺得別具意義,「當年我因為結婚作告別演出,完show後做賽後檢討,有埋怨過自己做得唔夠好,好自責『哎呀!點解唔認真做到最好呢?當時好後悔,覺得冇機會再開Show,第2世先算啦!』好感恩唔使等下一世。不過我冇後悔當年嘅決定,冥冥之中自有主宰,條路點行上天自有安排,決定咗就唔好回望,正如新歌歌詞一樣,要學會放下同感恩。最近我睇返Fans網上打氣留言喊到收唔到聲,完全唔明白佢哋點解多年嚟都咁支持我,我係唔識佢哋㗎喎?希望o依家流晒感動眼淚,到時唔好咁眼淺,我一喊就唱唔到歌。」問到可會邀請前夫曾智明捧場?直率的小恩子坦白說:「我唔知佢得唔得閒喎,如果佢想睇我都歡迎嘅,但一定唔會做主動,反而會邀請佢家人。」

仔女唔百厭撐阿媽

  受到前家翁曾憲梓影響,小恩子特別關注腎病病人,今次演出她不收分文歌酬捐給腎臟基金,目標購買20部洗腎機,為有需要病人解決困難。她笑說:「開演唱會節食、跳舞、練歌都唔係難,拉筋反而最辛苦,惟有盡做,(仔女點支持你?)佢哋話一齊陪我食清啲,仲承諾唔曳住,唔會令我勞氣同忟憎喎,其實我忙到都冇氣鬧佢哋啦。」


hd