《我的情敵女婿》家燕姐拍到燥底 劉嘉玲麻將枱惡鬥

鮑姐

  由葉念琛執導的合家歡賀歲片《我的情敵女婿》碌盡人情卡,搵來劉嘉玲、任達華、衛詩雅、鄧麗欣及王菀之等藝人參演。葉導演安排一幕打麻將戲打頭陣,麻將腳有劉嘉玲、家燕姐、鮑起靜同鄧麗欣,導演第一個鏡頭拍鄧麗欣係處 心積慮,因為之前傳過佢追求Stephy不遂,導致決裂並斷絕合作,最好踢爆流言嘅方法就係用行動去證明無咁嘅事。

第一場打廣東麻將戲絕對是重頭戲,導演話安排劉嘉玲演心理醫生Dr. 寶後已決定搵重量級巨星做她的病人,第一場戲就係一個雀局,由嘉玲姐安排,目的係用嚟醫三個病人,分別係有狂躁症嘅薛家燕、有抑鬱症嘅鄧麗欣及有強迫症嘅鮑起靜,戲中嘉玲輕鬆淡定有霸氣,所有嘢都係佢預計之內。呢幕「雀局醫病」氣氛緊張相當精采,葉導透露拍打麻將戲唔容易,因為要同時兼顧四家反應及對白,時間性要夾得好準,不過,四位阿姐埋位後就好有火花,效果相當驚喜,事事認真嘅嘉玲姐睇返Play Back都安樂晒。

家燕姐只此一次

  唔拍唔知家燕姐嘅秘密,原來佢完全唔識打麻將,好彩有教授級老手鮑姐幫手,家燕姐話:「我真係唔識打牌,邊度摸牌、點樣食糊完全唔知!」家燕姐開心果形象深入民心,但今次佢一反傳統演狂躁症角色,經常要面目猙獰及表情浮誇,忟忟憎憎咁夠晒新鮮:「呢啲角色唔可以拍咁多,一早同導演講適可而止,因為好燥底,拍攝時要谷到爆,好怕會爆血管!」家燕姐曾經歷人生低谷,好彩當年能樂觀面對。

鮑姐好冧劉嘉玲

  被導演封為麻將顧問,鮑姐笑言唔敢當,不過有段時間的確好熱愛開枱,每周「雀戰」兩次以上、「10年前決定戒打,主要係冇乜賭運,打親都輸,輸咗就好鬼谷氣,我寧願將輸嘅錢請朋友食飯,何必成日俾『麻將』激親啫,所以嗰排我頻頻請人食飯。」在ATV劇集《影城大亨》中,嘉玲姐曾演鮑姐的姨甥女,再合作特別有親切感,鮑姐大讚嘉玲儀態萬千:「佢連食煙都靚過人,我未見過有女人可以好似佢咁靚,不論手勢同動態,真係歎為觀止,佢夠型同靚,又有長腿,上帝真係好偏心,製造個咁完美嘅女人,我係女人都會嗒糖。」

導演讚有情有義

  葉念琛亦點名大讚Stephy有情有義,雖然有另一組戲要拍,但收工即趕來客串;戲中Stephy飾演抑鬱症病人,成日質疑老公。Stephy話拍得好好玩,雖然唔識打廣東牌,但感覺好似真係竹戰咁,點解肯客串呢?「緣份囉!幾位前輩好搞笑,嘉玲姐好有喜劇細胞,睇《大內密探零零發》時已對佢演喜劇好有印象,我哋拍攝時仲會一齊坐埋研究點拍會更加好。」

採訪:方騫平

hd