拍賀歲片囡囡可以睇 任達華再同嘉玲合作有火花

  在賀歲電影《我的情敵女婿》中,任達華飾演市儈勢利的躁狂「劏房大王」,脾氣極差會喪鬧員工,鬧完會送車送樓補償,到處留情嘅佢最後戀上初戀情人劉嘉玲的女兒衛詩雅。繼92年的《車神》後,相隔25年再同舊拍擋劉嘉玲合作,華哥大讚對方依然樣靚身材正,不過,講到全世界最索,當然係老婆琦琦及寶貝女任晴佳(Ella)。

  跟有氣勢嘅嘉玲姐再次合演情侶,華哥形容好有火花,其中坐電車一幕,係佢主動要求導演加上去,因為電車係香港人嘅情懷,相信好多愛情故事都曾經喺電車上發生:「今次最難得係合家歡電影,啱晒囡囡睇,只可惜首映時全家飛咗去南半球過一個熱辣辣新年,我哋會帶埋6條繩去跳,旅行期間一家人開開心心咁做心肺運動。」

推晒囡囡嘅片約

  錫女錫到燶嘅華哥可會視未來女婿係情敵?「我會用開放包容態度,只要個女開心我就開心。不過佢只得12歲仲係好細,到20歲先算啦,我見佢校園生活過得幾開心,成班同學仔一齊去食嘢睇戲,冇拍拖呢啲嘢。我同琦琦想佢有個快樂童年過番啱年齡嘅生活,堅持推晒Ella所有片約邀請,而且直至呢一刻,個女都冇表示想拍戲。」採訪:方騫平

hd