水果店進駐新型街市 喬寶寶一年分紅六位數

  48歲喬寶寶近年轉攻商界,果欄愈做愈大,更進駐新型街市,短短5年間分別在港島及新界開設了3間分店,還自爆當日6位數投資已賺凸了3倍,年年印印腳有6位數字花紅收。下個目標他希望每年可以開多一間,開夠10間做到十全十美:「今年各方面都要努力,因為要娶新抱,10月份26歲長子Inderpal結婚。」採訪:方騫平

  喬寶寶有份投資的JC Shop趕及過年前於坑口厚德街市開幕,現場舞龍舞獅,喬寶寶仲邀請一班圈中老友撐場,唔少街坊仲拉住喬寶寶「集郵」來旺場,好熱鬧。最初喬寶寶冇諗過成為「生果大王」:「10年前我做西瓜代言人,之後再下一城代言埋榴槤,點知好受歡迎,出埋榴槤冰皮月餅,因為果欄老闆係我朋友,佢問過我多次:『夾唔夾一齊玩吓?』始終香港人要食得健康,日日都會食生果,而且好少藝人做水果生意,呢門係一盤好生意,所以我咪投資小小落去,不過,果欄始終要半夜3更先開門,師奶唔太方便去買,所以進駐新型街市係有得做,消費者唔會介意走中、高檔路線。每周我都會巡吓舖,凡事親力親為,希望開多幾間有機會分到過百萬花紅啦。」

送酒席金器畀囝囝

  喬寶寶要努力再搵多啲錢,因為大仔就快結婚。「做IT既大仔『印度豹』今年10月結婚,未來新抱都係印度人,讀醫嘅,到時會喺英國搞婚禮,香港補擺40席喜酒請圈中朋友,我會送酒席同金器,兩父子冇所謂,佢要乜畀乜,我搵嘅錢都係留畀下一代,阿囝反而想低調啲。」


hd