靚過「潮流教母」 陳奕迅13歲囡變索爆長腿美少女

        近年星二代索女備受外界關注,除咗有「小邱淑貞」沈月、上山詩鈉嘅混血甜心女Hilary等,連近年絕少曝光嘅初熟Eason女、13歲康堤,原來都已變身長腿美少女。日前傍晚,亭亭玉立嘅康堤陪「潮流教母」媽咪徐濠縈去咗中環ifc Shopping。現已高過潮媽嘅康堤,紮上馬尾、五官標致,同母親似足兩姊妹。散發少女味嘅康堤靚樣更勝媽咪,睇嚟陳奕迅有排驚驚囉!



吹神Eason獨女康堤,自細活在父母光環下,「潮徐」成日同愛女著母女裝或將康堤打扮成潮童,一早已經上慣鏡。不過隨著愛女日漸長大,有指康堤唔想再成為公眾人物,早已提出唔再出席公開活動,甚至拒絕喺媽咪嘅社交網亮相,甚至連着衫都因為媽咪係fashion達人感到壓力,連Eason嫂都曾開talk講過:「囡囡話同我出街會好有壓力,會問『你着乜嘢呀?你話畀我知呀,使唔使襯番你呀?』我個女仲試過話我『你個嘴做乜咁紅嚟接我放學呀?』」

跟潮媽Shopping

愈大愈靚女嘅康堤身形高挑,輪廓愈見分明,與阿徐同樣具時裝觸覺,年紀輕輕已好識打扮,曾以白tee短牛襯羅馬涼鞋騷長腿,潮味絕唔輸蝕畀媽咪,絕對是星二代長線優質股。日前傍晚,身穿黑色長褸、渾身散發少女味嘅索爆康堤跟潮媽去ifc Shopping。皮光肉滑嘅Eason女先拉媽咪去Kielh's買咗袋護膚品,再陪母親行名牌CELINE。未幾,阿徐手拎一小袋戰利品步出,「兩姊妹」再行去服務櫃位換禮品。見束馬尾中間分界嘅康堤,瓜子口面、五官同媽咪餅印一樣,初熟靚樣更加省鏡。二人換完禮品,雙雙步出等的士。愛女打開車門時,笑笑口同司機講咗幾句,又問吓媽咪,個樣傻氣得嚟好可愛O架!

採訪 : 張詠森

hd