被游說再開個唱 朱咪咪唔等錢使耍手擰頭

  自從完成兩場紅館《利利是是演唱會2017》後,63歲的朱咪咪決定金盆洗手唔再做個唱,呢個決定令到咪咪姐開心晒,壓力全消,她自爆近年仍有唔少本地及海外娛樂商力邀她復出,但咪咪姐仍不為所動,她笑住扮寸說:「我又唔等錢使,去年底以1,538萬買入西貢成幢村屋O依家賺咗幾球(百萬),不過屋企人嫌遠唔搬入去住,打算裝修後放租,新屋好正有晒前後花園,總之多多錢都唔賣。」採訪:方騫平 場地:富麗華珠寶金行

  唔使愁生活的咪咪姐比前輕鬆得多,閒時Hea喺新加坡的獨立屋,放吓狗散吓步,新年就回港為相熟的珠寶金行「撈起」,笑說:「我係全職撈家,咪話唔信邪,我係第一個將新加坡文化帶過嚟,不過當年只係幫自己友撈起,老友黑妹李麗霞及李龍基等個個都撈到風生。我都識啲八婆嘢,如新屋入伙一定要搞Party旺人氣,拜四角之類。」當日她出動私伙醬汁及材料,落足心機砌靚盆「撈起」魚生,邊做邊賣口乖說:「遍地黃金,撈到唔停得手,唱到唔停得口,今年要做到隻狗咁…」O氹到老闆狂送利市,仲加碼畀埋兒子及新抱。咪咪姐仲搞笑地叫老闆們祝她青春美麗及賭運亨通,因為兩者都冇,還連輸幾場麻將。

唔強求抱孫

  自爆狂推演唱會job,咪咪姐零肉痛,她否認嫌錢腥:「演唱會只係代表地位,又唔係搵到大錢,出去唱幾場都搵得返啦,(搵夠可上岸?)睇你自己要求,自己食嘢好簡單,做人唔好要求咁多,日求三餐,夜求一宿搞掂,所以我更加冇要求抱孫,隨遇而安,生唔生都冇乜所謂。」


hd