攞正牌打人鑊鑊金 黃智雯對唔住袁偉豪

  黃智雯最近在逢周日播出的劇集《三個女人一個「因」》中,演繹人格分裂的大律師「方以因」,她坦言精神上拍得特別吃力,因好似一次過拍三套劇一樣,而其中一個人格「菠蘿椰奶 」,會經常出手打人,她承認往往受害者就是老友袁偉豪,更試過用隻鞋扑正對方個頭,令她相當唔好意思。 採訪:杜淑霞 髮型:Terrence Chan(Hair CWB) 化妝:Little White 服裝:Max&Co 場地:Cafe Deco Pizzeria

  收到要做人格分裂角色時,智雯即時開始搵資料,「我用咗半年時間喺網上睇咗好多片同資料,雖然呢套係喜劇,可以誇張小小都得,但我唔想偏離事實,但原來唔同人格,真係可以同原人格分別好大,好誇張都得㗎!」

  由於角色的三個人格反差好大,智雯坦承同一人分飾三角無分別,「今次真係好似同時拍三個劇一樣,最困難係一個人格轉去另一個人格,不但性格要變,造型都要即時變,試過一場戲轉晒三個造型,真係幾攰㗎!不過,亦都因為咁有好大發揮空間,自己覺得特別有滿足感。」

  智雯亦都好感激,戲中三個好拍檔袁偉豪、陳智燊和郭子豪,特別是同樣是Crazy Runner成員的老死袁偉豪,「我一變咗『菠蘿椰奶』就會成人打人,佢成日畀我打,有時唔可以排得太清楚,我試過打得興起,成隻鞋扑咗落佢個頭度,佢仲要忍住拍晒先叫痛,真係好對佢唔住㗎!好彩大家咁熟咋!」


hd