開騷以成長經歷取材 余迪偉鼓勵港人不怕變

  余迪偉除了電台工作,做電視節目主持,最近再有新搞作,將於4月舉行首個一人劇場《一支弓》,以他的成長經歷取材,由於要邊講邊演,壓力好大,加上到時有機會要大晒肌肉,他新年時都唔敢放肆大吃大喝。他又希望透過分享自己親身經驗,鼓勵香港人唔好怕改變,提醒大家其實適應力超強。 採訪:杜淑霞 髮型:Winky Wong@The Attic 化妝:Echo Wong

服裝:Wagamamaplayground 場地:Secret 9

  迪偉10年曾經孖住鄒凱光舉行《爆響口之唔出得街》,但他表示今次《一支弓》形式好唔同,「嗰次係棟篤笑形式,而且有鄒凱光一齊,今次我真係得一支公,仲要係戲劇形式去表達,乜都靠自己,所以特別大壓力同緊張。」

新年忍口為騷肌

  幸好今次取材自迪偉的成長經歷,好多內容都唔使特別去記,他更預告會有好多料爆,「譬如我以往嘅感情生活,同屋企人相處,好多嘢以前係未講過㗎!」另一樣他有機會赤裸裸呈現,就是拍宣傳海報時已展示過的好Body,「呢樣真係要睇到時操成點,我新年都有忍口,希望到時可以露多啲啦!」

  問到今次開騷目的?迪偉最想藉住這次機會鼓勵香港人,「整個故事會由我細個講起,所以英文叫《Salute to a Little Boy》。如果問我最想觀眾帶啲咩走?就係我嘅經歷同好多8、90年代香港人一樣,我好想提醒大家,事實上香港一直都變緊,大家唔好怕改變,大家其實適應力好強。change is good!」


hd