爆勝利講國語對白有粗口音 王梓軒笑言拉衫尾赴韓發展

  王梓軒(Jonathan)兩年前演出的電影《宇宙有愛浪漫同遊》終於上映,該片由陳思行(前名陳加玲)執導,大玩嶄新組合,除他還有韓國天團BIGBANG嘅勝利、白冰及郭碧婷等,電影以法式浪漫、互愛及正能量為主題。梓軒首同勝利合作印象好好,佢爆料話勝利時常反高潮,好搞笑,「佢講對白時常會發出粗口音,爆笑到不得了,所以成為劇組嘅開心果,難得佢唔介意大家一齊歡樂吓,係一個難忘回憶。」採訪:方騫平

  王梓軒拍《宇宙有愛浪漫同遊》時好愉快,最開心可以同勝利合作,仲大讚對方好鬼正:「佢細我4年,性格好開朗,勇於同人溝通同嘗試,仲唔怕講錯全部國語對白,劇組根本唔知佢講緊乜,最爆笑係對白會有粗口音,我哋冇糾正佢,因為真係好好笑,佢又唔介意笑埋一份,佢真係好可愛。O依家我哋見面嘅口頭禪係:『幾時去飲嘢?』因為部戲由開頭到拍完都夾唔啱時間約食飯。」

提起坤哥就笑

  梓軒又笑言想拉勝利衫尾進軍韓國市場,他笑說:「勝利哥唔介意帶梓軒弟弟出去搵食。」他又主動話介紹個華裔女仔給他,等他加速學國語。問到可會介紹緋聞女友家燕姐囡囡石祐珊?他哈哈大笑,話反而較關注坤哥同時對家燕姐兩母女有興趣:「其實都好呀!等珊珊唔好受我哋緋聞影響搞到佢冇市場,珊珊好多人追㗎。」不過梓軒語重心長「警告」坤哥小心啲:「你追完家燕再追家燕姐個女,唔怕你個家燕唔開心咩?呢兩位女士要求好高,唔好以為口花花可以追到呀,有乜你要諗清楚呀。」


hd