嫩夫好鍾意湊女 洪欣shopping好Free

  張丹峰,36歲,內地演員,09年娶咗大自己十年嘅洪欣後,香港人對佢認識深咗0.3,見到佢會覺得熟口熟面,但唔會叫得出佢個名,最多叫佢洪欣老公。日前下午,洪欣同老公及4歲囡囡張晞彤去超市買嘢,46歲唔識老嘅索媽負責揀嘢,嫩夫全程照顧前世情人,難得老公咁鍾意湊女,洪欣出街相當Free。 採訪:梁志明

  香港娛圈有好多美魔女,包括46歲嘅洪欣,佢確實得天獨厚,個樣無膠味,素顏非常靠得住,西人眼中頂盡30歲。最重要佢非常有米,唔使愁生活,皮膚自然好,之前佢被踢爆擁逾7千萬物業,其中三個位於港島區嘅物業更加唔使按揭,一筆過找數,真係恭喜佢。

買嘢唔使煩

  日前下午,一滴妝都無嘅洪欣同老公及戴住口罩嘅囡囡去銅鑼灣時代廣場超市Shopping,零妝嘅佢無戴口罩,見佢主力發版買呢樣同買嗰樣,之後再去隔離LOG-ON睇家品,留意返,洪欣老公全程負責照顧個女,唔係拖就係抱,抱得多見攰就放落地,咪以為放落地可以唞一陣,洪欣老公都會攬實囡囡喁喁細語,呢個老竇都相當唔錯。


hd