趁創世界紀錄前減壓 李行齊首次郵輪工作當度假

  「傑青魔王」李行齊(小齊)最近獲邀到亞洲全新豪華郵輪「世界夢號」三月份的4個周末,在郵輪上教學演出。在剛過去的首個周末(3月3日),小齊教授郵輪上的小朋友魔術技巧,又陪他們在遊客面前表演。而首次在郵輪上工作的小齊,趁住3月11日再創世界紀錄前,享受難得的海上假期輕鬆一下。 採訪:杜淑霞

  當日小齊在魔術班上,先表演幾個魔術,即O氹得一班小朋友勁興奮,猛讚「好神奇」,令他們更加有興趣去學習,之後小朋友輪着上台表演都有板有眼,最後小齊仲陪主表現好的小朋友向郵輪上其他遊客表演魔術,氣氛相當熱烈。

  對於首次在海上教學,小齊笑言似考他語言能力,「郵輪有好多唔同國藉嘅人去,雖然今次教嘅小朋友都係黑頭髮黃皮膚,但係有啲要講廣東話、有啲要講國語,仲有啲要講英文,見佢哋聽唔明就要即刻轉Channel,好似考緊會話試咁,真係幾得意㗎!不過佢哋個個小朋友都好精靈,學得好快。」

  至於第一次在郵輪上工作,最初小齊都擔心會悶,「始終收咗工都要喺船上面活動,初初都會擔心會唔會悶呢?點知原來有好多設施可以玩,好似滑繩索同VR遊戲,仲有好多嘢食選擇。我喺準備3月11日挑戰『國際魔術師協會世界紀錄』嘅『100秒內完成最多組魔術幻象』前,都可以好好放鬆下。」


hd