Enjoy天倫樂 湊孻女家庭飯局 沈嘉偉偕餅印二女 「拍拖」食壽司

  I.T主席兼行政總裁沈嘉偉,自99年娶咗女神邱淑貞(豆斗)後,婚後育有三個女,一屋女人嘅模範人夫兼父親非常幸福!日前一連兩日,廿四孝Daddy帶凍齡靚老婆及孻女小沈晨,同胞弟一家喺跑馬地家庭飯局。前一日,沈嘉偉就和13歲二女沈日「拍拖更」去希慎廣場撐枱腳食壽司。席間,暖爸對面圓餅印二女照顧有加,點sushi、斟豉油、遞紙巾等,十級細心!唔怪得三個女平日咁黐呢位滿分父親啦!

        天生外父相嘅沈嘉偉,同索爆老婆邱淑貞育有三名現年分別16歲、13歲和7歲嘅公主。愈大愈靚嘅大女沈月近年被捧做「最索星二代」。去年4月,「小邱淑貞」情竇初開,與年約20歲、貌似韓星李敏鎬嘅男友喺中環ifc睇戲拍拖,惟中途被記者撞正,嚇到「走夾唔唞」。

米芝蓮飯堂

  大女有拖拍,近來沈嘉偉家庭樂都唔見沈月同行。日前周四晚上8時,沈嘉偉夫婦偕孻女沈晨約咗胞弟沈健偉一家喺跑馬地彭慶記食飯。餐廳自12年獲頒米芝蓮一星後,沈和老友郭富城和張智霖都變咗熟客,愛食其招牌菜士多啤梨生炒骨和大良炒鮮奶等。Gathering個半鐘,兩家人步出,見沈健偉拎住外賣和老婆女兒走人,沈嘉偉就陪孻女步出,見小沈晨企唔穩,慈父馬上出手扶實,然後再緊拖小手過馬路上車。豆斗見有記者在場,離開時戴番副墨鏡,星味十足。

Cutie二女似父親

  飯局前一日下午4時,廿四孝沈生就撇甩愛妻,同二女沈日去銅鑼灣「拍拖」食壽司。早排,有記者撞破沈生和大女沈月去淺水灣食晏,呢日就輪到陪另一位「前世情人」。當日,沈生手挽個$17,500黑色LV袋陪二女去銅鑼灣食tea。長髮過肩、眼大面圓圓有baby fat嘅二公主,睇落似daddy多啲。短裙二女拎住手機、黐實父親行上希慎廣場撐枱腳食壽司。兩父女坐卡位,暖爸點了一些壽司後,二人各有各玩手機,未幾食物上枱,沈生好細心幫阿女斟豉油、遞紙巾等,二人邊食邊講,全無代溝。歎足大半小時,才滿足走人。

採訪 : 李權威、梁志明、李維隆

hd