咁啱見到 晚宴再遇松岡李那無避忌 周焯華任影唔嬲

  香港最型棍娛樂公司老闆周焯華因為喺夏威夷醉攬33C松岡李那,令後者繼「蜜桃胸」後多咗一個朵,有朵有運行,女方唔刻意澄清,最緊要有錢搵。前晚,蕭定一嘅hmv數碼中國集團舉行周年晚宴,周老闆同松岡都有出席,有報道指坐唔同枱嘅前者見到後者好開心,仲話男方一於少理捉住松岡係咁傾,實情係,周生見到相熟傳媒高層坐喺隔籬枱,過枱打招呼時發現松岡原來喺附近,隨意吹兩句水,有人吹雞叫合照,現場電話係咁閃係咁閃,周老闆笑晒任影唔嬲,件事就係咁囉。

        周焯華同松岡緋聞其實都已經Out咗,但一個晚宴令兩人名字又連埋一齊。有報道指周生原本被安排跟蕭定一同坐主家席,而松岡同張建聲等藝人坐另一張枱,報道更指現場有人報料,指兩人「雖然相隔頗遠,但周生一見到松岡即刻好開心坐埋去,雖然有近30圍枱,但周生一於少理,同松岡講到雞啄唔斷,張建聲見狀都識做坐開,最後讓埋個位俾周生坐。」

時序錯晒

  有圖未必有真相,實情是,周生見到相熟傳媒高層坐喺另一張枱,於是行近打招呼,傾傾吓先發現松岡原來坐喺同一張枱,見到朋友打招呼傾偈是常識,但絕非一見到松岡即刻好開心坐埋去,時序完全錯晒。之後有傳媒見到緋聞男女傾偈咁「大件事」,當然係咁影係咁影係咁影,周生見慣世面,大方邀請傳媒埋身影靚啲,氣氛超好。

全場high爆

  蕭定一搞晚宴,筵開39席,為配合特工主題,一眾出席藝人都打扮到好有型。張繼聰、欣宜及連詩雅等在晚宴上獻唱,而張智霖同蕭定一更帶領一眾藝人大合唱《無言感激》,識唱一齊唱,全場high爆。最開心當然係抽獎環節,胡杏兒及Chilam等分別上台頒獎送出獎金及iPhone X。

撰文︰廖思慧

hd