泰國試做老闆無錢搵 梁祖堯湯駿業賺經驗搭夠

  梁祖堯和湯駿業這對好朋友,在舞台上合作就試得多,最近首次為ViuTV主持節目《老闆咁易做》,以真人騷形式在泰國揸着外賣熟食車謀生,由曼谷玩到去清邁等地,由於好多地方連攝製隊以及當地翻繹都未去過,所以既冒險又好玩,他們都承認若計做老闆,今次搵唔到錢不算成功,卻賺了寶貴經驗。   採訪:杜淑霞

  梁祖堯和湯駿業話本身一直都好想開食肆做老闆,但香港租金貴,搵地方開舖唔容易,所以都係得個諗字,難得今次ViuTV邀請他們,仲要去到泰國,兩個都膽粗粗答應,「其實都冇乜嘢要考慮,只係啱啱有舞台劇,要就時間啫!」

望去偏遠地方再拍

  攞住8000千元泰銖(約2000千港幣)買食材和生財器具做生意,梁祖堯和湯駿業未覺太難,因當地物價平,反而是事前好多地方全組人都未去過,根本不知如何做生意,祖堯說:「有好多地方係邊行邊搵,唔好話我哋成組人,就連當地翻譯都未去過,所以都唔知喺邊度做生意啱,所以咪搞到畀警察趕囉!」

  不過正因為有種探險感覺,所以兩人覺得特別正,湯駿業說:「講做生意我哋唔算係成功嘅,但係我哋賺咗經驗,好多地方自己去旅行都唔會有機會去到。」兩人更希望再拍新一輯,湯駿業說:「當然想拍新一輯啦!如果可以就去啲更加特別嘅地方,譬如西藏或者蒙古,甚至係絲綢之路,應該仲好玩。」


hd