升呢做網紅 Coffee唔介意長腿好友搶Fo 

  近年主力做瑜伽導師嘅林芊妤(Coffee),Mark實高大銀行高層男友Weng Chak,人後人前鬼咁sweet。日前下午,Coffee一身密實裝與女友人行圓方,其高妹好友短裙晒髀,幾咁吸睛!被搶Fo嘅Coffee一啲都唔mind,繞住好友把臂shopping,心胸果然好廣闊吓呀! 採訪 : 李權威

  34D靚Body嘅Coffee,同澳洲籍有米男友Weng拍拖年幾,28歲Coffee早已視對方為結婚對象,諗住過兩年結婚生仔喎!而近年密密拍片擺上網賺錢吸Like嘅佢,有指一個post閒閒哋收2、3萬,唔怪得成日放風話恨買樓,又希望開間瑜伽學校啦!

狂搵錢開學校

  日前下午5時許,自爆僅得21.5吋纖腰嘅Coffee密冚好身材現身圓方,同行有高妹好友、一位媽咪級好友及其兩位年幼B女。見Coffee和長腿好友早已一人一袋戰利品,三女再行入zara睇衫,揭吓衫褲又吹吹水。由於掛住傾偈,無乜心機揀衫,三女速睇一輪就出門口再傾過。此時,四眼媽咪要帶囡囡走人嘞!軟骨Coffee彎低個身,錫錫B女才肯放baby離開。其後,Coffee兩女再hea行CHANEL吓和FENDI,無買就雙雙行出門口等的士走人。


hd