風騷替好友賀壽 蜜運廖碧兒網上認戀失婚金龜

        上周,39歲嘅廖碧兒(Bernice)被指與高大型男同遊芬蘭,隨即被揭疑似做「小三」、硬撬有泰籍女友Nina嘅失婚富二代Calvin Lo(盧啟賢)。其後,碧兒例牌否認有新戀情,只謂同Calvin「正了解中,日後有好消息再同大家講。」口講一句,心卻誠實行動!日前晚上,Calvin喺網誌大晒同碧兒乾杯撐枱腳相時,女方就不避嫌奉上「心」形符號,大方認愛。上周六(10日),本報發現蜜運中嘅Bernice與好友去福臨門搞生日飯局。離開時,碧兒笑到好hyper、失晒儀態咁,沐浴愛河嘅女人係風騷啲O架嘞!

入行17年嘅Bernice,先後同劉愷威和陳豪拍過拖。其中10年,有指碧兒拜金劈腿,狠飛陳豪,轉投李澤楷表弟林忠豪懷抱,惜未夠一年又甩拖。隨住近年Bernice喺法國買地釀酒,推出自家葡萄酒品牌「Bellavizio」,又考獲三級品酒師執照後,生活指數升呢嘅佢被指有個富豪密友,進駐大埔千萬豪宅倚龍山莊,出入有司機,父母入住羅便臣道豪宅嘉兆臺。直至日前被踢爆與失婚兼有一女嘅有米才俊Calvin暗撻幾個月,碧兒嘅神秘感情史,才逐漸浮面。

  新歡高高大大、有型有款,而且仲係跨國投資公司嘅CEO,同一心釣金龜嘅廖碧兒啱晒key。上周被揭戀情同時,Calvin相約Bernice飲紅酒撐枱腳,女方不避嫌奉上「心」形符號,索性大方認愛。熱戀中嘅碧兒,上周六同一班好友喺灣仔富豪飯堂福臨門食生日飯時,明顯心情勁好,一行十人一邊品嚐乳豬、炸子雞、蘿蔔炆牛腩、灼豬潤、茶粿和壽包等,開心飲咗7支香檳及紅酒,盡興而歸。Gathering三小時後,碧兒等人約十時半步出,微醉Bernice身穿黑衫黑褲配頸巾,一邊單手插袋、一邊同好友吹水。化咗妝嘅碧兒春風滿面,飲到high high地仲失控狂笑,最後由女助手揸車,送佢返大埔豪宅。

採訪 : 張詠森、李維隆

hd