頂「嘉倩BB」主持港台節目 鄭萃雯再過主播癮

  前TVB主播「新聞之花」鄭萃雯年前誕下雙胞胎囝囝後,為湊仔而放棄主播工作,但對傳媒工作仲好有癮的她,最近終接替同樣主播出身的陳嘉倩主持港台節目《大氣候》。由於節目在電台播出,她坦承最初好擔心自己有懶音,不過能夠再參與幕前工作,她覺得好開心兼過足主持癮。 採訪:杜淑霞

  對於有傳「嘉倩BB」因緋聞而被飛出《大氣候》,節目監製胡世傑強調是對方主動提出休息下,而鄭萃雯亦不覺得自己是「執二攤」,她認為自己能勝任便可以,「自己一向跟開環保同健康課題,有信心做得嚟先接受監製邀請。」

想再做幕前

  鄭萃雯又表示本身大學是讀廣播,雖然為湊孖仔離開TVB轉做公關,但對傳媒工作仍然好有興趣,《大氣候》每周直播一次,完全無影響她正職和湊仔,又可過足主持癮。她反而最擔心自己有懶音,「以前做主播唔係淨係靠把聲,但以電台製作形式,所以會特別留意自己咬字。」

  一對孖仔已兩歲大的鄭萃雯,很享受湊仔生活,但講明將來仲有機會多做幕前,「嗰時放棄做主播係迫不得已,我同老公都要輪班,夜晚冇得瞓真係唔掂,我嘅公關工作時間彈性好大,好多嘢可以喺屋企做,有多啲時間湊小朋友,不過遲啲等小朋友大啲,可能會再做番多啲傳媒同幕前工作都未定。」


hd