瑞士滑雪遇大風雪 陳細潔冒生命危險都要滑

        「鯊魚女」陳細潔(Abbie)自去年上任保良局主席後就非常忙碌,連去旅遊的時間都冇,但每年年初都有到外地滑雪的習慣,所以幾忙都好,她早前終抽到6日時間往瑞士的Crans Montana滑雪。首次去呢個滑雪場,卻遇上大風雪,由於時間倉促,Abbie冒住生命危險都要滑,她笑言:「最多滑得慢啲、小心啲,唔滑條氣唔順。」

        Abbie原定約了4個朋友一齊在2月初出發,但因工作太多改了兩次期,結果只有一個朋友肯等她。可惜去到當地頭兩日有大風雪,問她會否覺得好冇癮?她笑言:「我冇理,照去滑,因為唔滑條氣唔順,但睇唔到周圍環境,所以滑吓又停吓,而且滑時要比平時用多5倍嘅力,所以滑得好辛苦,一啲都唔enjoy。」

  她最開心是去年在英國購買了著名法國運動品牌Moncler的雪褸和雪褲,今次着咗咁多日,每日都有人讚她着得好睇,她開心表示:「真係日日都有讚,仲唔係得一個讚喎。」所以今次滑完雪有時間,她都有在當地的Moncler專門店掃了幾件冷衫。而且當地的食物也不錯,她品嚐了巨型牛肋骨、南瓜炆羊肉、鴨胸肉、龍蝦和串燒等,再配她至愛的紅白酒,真的非常美味,總算補償番少少。

撰文:李佩儀

hd