不甘敗走樂壇21年 鄭梓浩返港再做歌手

  由薛家燕及黎小田主持TVB《流行經典50年》,造就唔少已蒸發多年的歌手翻生,繼49歲的蔡興麟及50歲的黃翊後,49歲鄭梓浩(Brian)演繹93年舊作《孤單的我》同樣獲讚,指他有型靚仔兼唱得好!這位91年新藝寶新人甚至被網民起底,對於消失樂壇21年,Brian坦言有段悲慘的「小故事」,不過,風雨過後,今日回來尋找昔日失去的舞台,目標向紅館進發。 採訪:方騫平 髮型:Chris Cheng@IL COLPO Platinum

  鄭梓浩曾在91年和93年推出兩張大碟,他憶述:「我同郭富城、林志穎、梁漢文、鄭伊健及張衛健等同期出道,當年真係好精采,好熱鬧,加上4大天王聲勢,我哋呢啲4線歌手表演空間唔大,完全處於陪玩狀態,加上約滿同埋政治因素,最後冇得留低,既然喺香港搵唔到食,最後好唔願意跟屋企人移民紐西蘭,坦白講,我好愛唱歌,作為年青人係失望嘅。移居後仲要適應當地生活,重頭做起,我喺街市賣過菜、做過髮型師、室內設計師,捱咗多年,o依家有髮型屋有美容spa及茶餐廳。不過,都有Keep住教人唱歌,又會喺當地社區演出keep住把聲,始終唔會放棄音樂。」其實03年,Brina曾返港探路復出,但遇上沙士。直至參加完《第4屆中國好聲音總決賽》,更加想為廣東歌做啲嘢,所以決心回來尋找失去嘅舞台。

  Brian坦承開始接觸音樂人做新歌,亦有好多諗頭:「我好欣賞郭富城跳舞,都好想同佢同台演出,做吓集體show又得,我會好open當自己係新人咁嘗試唔同嘢。」

  Brian亦多謝昔日戰友黃翊為他搭路上《流行經典50年》令大家勾起集體回憶,問他係咪做咗老闆有經濟基礎,所以變得身痕要重返舞台呢?他大笑說:「真係身痕呀,因為對唱歌熱誠從冇減退,拎起支咪會好自然。」


hd