《華爾街》演金融精英 陳家樂炒燶股唔見6位數

  陳家樂最近首度跟導演黃國強(KK)在福斯傳媒集團及企鵝影視出品迷你劇《東方華爾街》合作,劇中家樂演地下金融精英組織「 CASH 2.0」成員、性格激進的「BJ」。現實中家樂不但唔係金融精英,兩年前仲試過炒燶股,聽朋友講買咗6位數就狂跌變成仙股,這次教訓令他以後不敢再炒股票。 撰文:杜淑霞

攝影:李權威 場地:Marco Polo Hong Kong Hotel

  家樂在《華爾街》演的「BJ」性格激進,他很感激KK發掘他這一面,「我以往做開斯文角色,估唔到KK會睇到我呢一面畀我去試,不過未演過最初都擔心應付唔嚟,好在劇本好,加上其他演員都好幫手。」KK就解釋睇過家樂以往作品,覺得他應該做到,「同埋佢未試過對觀眾嚟講都有新鮮感。」

有望拍第二季

  KK今次選擇拍金融題材,以為他對這方面好有認識,原來都是邊拍邊學,「我本身唔係好認識,所以花咗成年時間做資料搜集,寫完劇本初稿好似將全部資料塞晒入去幾深,之後要慢慢修改等大家容易啲明白。」家樂劇中雖扮金融精英,但現實中炒股竟試過慘痛經歷,「兩年前拍咗幾套戲,有筆6位數現金,聽朋友講試吓買股票,點知一買就狂跌變成仙股,呢次係一個好大教訓,以後有錢都係儲起買樓,唔敢再掂股票啦!」問到會否拍第二季,KK話要等第一季播完才有定案,但家樂卻爆料指:「第一季裏面有好多伏線,絕對可以拍第二季。(你想唔想再拍?)當然想,我仲知我第二季會點發展O添!」


hd