父親節心聲 慶幸BB遺傳老婆好基因 祖藍珍惜低頭望囡機會

        明天就是一年一度的父親節,是子女向普天下父親表達心意的大日子。早在讀演藝時父親已離世的王祖藍,多年沒慶祝過,去年12月太太李亞男為他誕下可愛B女天韻(Gabrielle),今年將首度以父親身份歡度佳節。祖藍坦承有寶貝女在身邊已是最佳慶祝節目,他又表示囡囡令他整個生活都有所轉變,工作再忙都會趕返屋企見女,珍惜湊女時間,他解釋因 Gabrielle遺傳了媽咪亞男又高又靚好基因,「我能夠低頭望佢嘅時間真係唔多,所以真係見證住佢成長,慢慢高過我啦!」

祖藍早在讀演藝時王爸爸已因病過身,加上父親性格內歛,兩父子鮮有慶祝父親節,「我老竇係外冷內熱,所以我印象當中冇乜慶祝過父親節,嗰個年代又冇咁興慶祝,直到口依家興爸爸已經唔喺度。以前試過父親節得一個人喺屋企食飯,睇新聞見到有人慶祝,我通常會比較沉默,有種睇住人慶祝自己又冇得慶祝,又會掛住爸爸嗰種感覺,但又唔會好傷心,只係種難以講嘅沉默,口依家有咗小朋友,以後就會有多種意義去慶祝父親節,又令我體會養兒方知父母恩,更加明白爸爸幾咁外冷內熱,其實內心係好熱嘅。」

  講到首個父親節如何慶祝呢?祖藍就話有女萬事足,「有Gabrielle已經係最大嘅禮物,最緊要一家人一齊食餐飯,抱住佢影張相,記得今日係父親節,已經很特別很好了。」至於未來的父親節,又想囡囡如何為他慶祝呢?「口依家佢仲細,唔會話送咩禮物畀我啦,我都好期待到佢識畫畫,定係識做小禮物小手工,學校老老土土咁,佢搵蠟筆畫幅畫畀我,如果有日收到都好期待係咩感覺。」

讚女趁機冧亞男

  祖藍承認自從囡囡出世後,生活轉變了很多,特別是少了出門工作,「我費事突然要困喺另一個地方三個月,所以一般拍劇拍電影都會留喺香港,起碼返到屋企,綜藝節目我先至走。自己少咗出門,因為好想返屋企見到BB啦!因為佢口依家去做檢查,醫生話佢個高度,有10個BB有9個矮過佢,所以佢應該完全承繼咗亞男嘅DNA,我能夠低頭望佢嘅時間真係唔多,所以真係見證住佢成長,慢慢高過我啦!」

  對於囡囡似足媽咪,祖藍好安慰,「直頭要開香檳啦!我最初都以為自己基因好強,點知畀亞男偷襲成功,阿囡又似媽咪身高,又有佢對咁靚嘅眼,似媽咪梗係好啦!咁世界上咪又多個好女仔囉!」不過祖藍無話有女就唔理老婆,講明會加倍愛錫亞男,「發覺做媽媽真係唔容易,每日見到佢照顧到個家庭咁好,煮飯洗碗,自己又冇工人,雖然有保母幫手睇住BB,但自己都要幫手餵奶換片,夜晚又要起身,有時我出門,仲要幫我執行李,又要提我呢樣嗰樣,我都係個小朋友嚟,佢口依家好似照顧兩個小朋友咁,我梗係要更加愛佢,要兩夫妻關係好,個BB先可以健康成長㗎嘛!」

唔介意囡囡入娛圈

  談到對Gabrielle期望,祖藍認為女大女世界,「首先係希望囡囡健康,其次希望佢青出於藍,唔係事業嗰啲,因為佢仲咁細,但希望佢有佢嘅世界,我都可以喺佢身上學到好多嘢,佢嘅未來係點㗎,我都好奇去知道囉!」如果囡囡要步父母後塵入行,祖藍一樣尊重,「我真係好自由嘅,因為我諗我對我個女會好似對我個妹咁,佢有自己世界,鍾意點就點,鍾意讀演藝我又唔反對,鍾意選美我又冇所謂,最緊要陪伴佢,而喺慢慢嘅成長過程,佢懂得獨立去判斷,我哋只要尊重咪

得囉!」

  請祖藍向18歲時的Gabrielle,送上一段爸爸心底話,鬼馬的祖藍好輕鬆咁話,「你都18歲我甩難啦!哈哈!你有毛有翼,你隨便飛啦!唔使理我,今日我同媽咪仲好好你放心,我哋兩個會錫住大家。」

採訪:杜淑霞

hd