澳門直擊 濕身性感為阿根廷騷任嘉賓 蔣祖曼誓保三點不露

  蔣祖曼(Joman)獲澳門美獅美高梅邀請為美高梅劇院阿根廷極限表演《FUERZA BRUTA WAYRA》著名橋段《Mylar:天空泳池—膜拜吧,水中女神!》,首次濕身性感任嘉賓。日前她大騷41吋長腿首度為表演綵排,由於要在半空中透明泳池演出,驚水的她反而唔擔心太性感,仲話保住三點就得! 採訪:杜淑霞

  Joman笑言上周似伴讀書僮陪泰臣為《Corredor:奔跑吧,極速人生》綵排,今次自己升呢,「我呢個書僮終於坐正,不過上次陪佢排,都學到好多嘢,起碼認識多咗藝團嘅運作模式,又跟台前幕後熟絡咗,對今次演出好有幫助。」

時間緊逼壓力大

  不過未綵排前,Joman依然好緊張,「我自己睇過幾次阿根廷藝人演出嘅版本,真係好靚好優美,自己好擔心演唔到呢個效果,真係埋位再發覺其實我係有小小驚水,雖然個池嘅水唔算深,但係個池會搖動,啲水會不時衝過頭,最初都有小小擔心,好彩後尾適應咗,其他演員又好照顧我,不停喺旁邊提點我。」

  由於時間緊逼,Joman只有三次、每次兩小時的排練,令她壓力好大,幸好有師兄泰臣陪住,「今次到佢幫我壯膽,雖然我哋唔同環節,但大家可以互相鼓勵。」不過阿根廷演員演出時真空上陣,Joman直言,「我一向表演都冇乜底線嘅,不過老公同經理人都唔畀我咁大方,所以會保住三點不露啦!」


hd