北上多年 返港Shopping 程小東有國產女陪掃罐頭

  打入國際多年嘅動作電影導演程小東,近年來長駐北京籌拍電影,坦言只有三分之一時間在港。日前下午,見程導演孭住背囊現身九龍灣會展中心,身旁有一位穿上連身裙、操普通話嘅中女親密陪行街。兩人連體行零食屋,掃咗成箱罐頭鮑魚,似係帶返內地慢慢歎喎。 採訪︰李維隆

  程小東嘅代表作一籮籮,計87年由佢執導、徐克監製嘅電影《倩女幽魂》外,92年就憑《新龍門客棧》奪得第29屆金馬獎最佳武術指導,及在02年憑《英雄》勇奪第22屆香港電影金像獎的最佳動作指導,其後08年搵陳慧琳拍咗部《江山美人》,完成埋11年嘅《白蛇傳說》後似沉寂咗一輪。

  原來佢話去咗印度做導演,拍咗兩套電影亦攞埋獎。

  不過程小東家庭生活超級低調,只知道佢老婆係已故邵氏武打影星汪禹胞妹,兩夫婦育有女兒Sharon。日前下午3時,程導演和一位化咗妝、年約四十幾嘅國產女結伴行九展。近年好多自由行團去嗰度shopping,程小東亦有興趣去行吓零食店,見兩人在店內兜咗個圈揀咗幾支嘢飲,臨出門口時發現有特價即食罐頭鮑魚,馬上大感興趣,然後叫店員執夠一箱,買咗成箱走人。


hd