陪謝東閔遊皇馬球場互影 張振朗西班牙跳火堆除黑氣

  張振朗之前趁未有劇出的空檔,跟好兄弟謝東閔(Brian)及索女劉穎鏇到西班牙拍旅遊節目《12個夏天》,寓工作於娛樂兩星期。講到難忘經歷,他首推在巴塞隆拿入住咗一間黑漆漆恐怖旅店,另外,又入鄉隨俗,隨住當地迎接夏日慶典跳火堆,祈求去除黑氣兼帶來好運,唔再做「地獄黑仔王」,劇集存貨可以順利播出。採訪:方騫平

  對於西班牙旅程,張振朗話有好多體驗:「巴塞首晚被安排入住一間近郊旅店,旅館環境漆黑、簡陋,唔多乾淨,沿住房間走廊,兩邊氣窗可落鐵閘,置身其中好有危機感。」他忍不住拍片留言說:「間房嘅特色就係插卡開關係壞嘅。」雖然住得唔好,但張振朗冇諗過離隊搵間好酒店棲身:「係一個體驗,咁大個仔第一次住呢啲旅館係有啲驚,唔係怕靈異嘢,係冇安全感,而且見有男住客只着住條孖煙囪喺走廊行嚟行去,我一個人住,瞓得唔好,幾個鐘頭醒一次,好彩只係小住一日,翌晚經已搬咗去市區一間四正啲嘅酒店,有對比,更珍惜返回天堂。」

請晒一家人去旅行

  問到為何唔同謝東閔孖鋪壓驚?張振朗笑說冇諗過,「我同Brian已經好似hehe,我倆先到埗,趁第一日未開工,我陪佢去咗皇馬班拿貝球場參觀,仲好似情侶咁互相影吓,幾得意。佢鍾意睇波,特別係球星C朗。」張振朗讚當地人好Nice,冇種族歧視,每個人都可以好舒服咁做自己想做嘅野,唔需要去介意別人嘅眼光,相對香港壓力大好多:「不過,我個人好易滿足,跳火堆時只求順利播到劇集,同埋咁大個仔未同屋企人去過旅行,好想有呢個家庭樂,所以返到香港即約齊屋企人去日本,我全包一家八口機票同酒店,唔知係咪跳完火堆願望成真呢。」


hd