Dear Jane任嘉賓放笑彈 容祖兒歸家才知撞瘀耳仔

  容祖兒前晚舉行第10場紅館個唱,請來樂隊Dear Jane擔任嘉賓,合唱之餘,搞笑對話更發放不少笑彈。另外,祖兒完騷後發覺被人工智能mic stand撞瘀耳仔。

  祖兒台上說,Dear Jane跟她可說一見如故,由Dear Jane的Howie為她作曲的《心之科學》獲得好好成績。主音黃天翔就表示,十分多謝祖兒,年初他們開紅館演唱會,祖兒未等他們開聲就主動話mark期來支持。祖兒笑道:「嗰日我見你幾個有嘢又唔講,個口含住泡嘢咁,既然知道你哋開騷就心照啦!我咪主動講囉!」Jackal話:「因為我哋band房少女仔上來,突然間唔知點好,好緊張。」祖兒即笑着回應,「你知唔知我都好少男仔朋友㗎?我身邊人全部陰氣好重……」Dear Jane馬上說:「咁我哋一齊玩多啲啦!我哋不如再寫多首歌畀你!」祖兒聞言說:「好呀!《心之科學》咁好成績,咁你哋去開拓心之體育、心之……」引得觀眾大笑。

  此外,前晚舞台的人工智能mic stand自動迴旋時,反彈力太強,祖兒返到家才發現撞瘀耳仔,她分享相片並道︰「真係越跳越起勁,尋晚返到屋企發現隻耳仔瘀咗,唔怪得知跳緊嗰陣覺得有一下痛痛地啦,好彩唔係冚親個嘴咋,唔係就嚇親大家啦!繼續一切順利!」


hd