傳成功追仔 45歲意外懷第3胎 大肚蔡少芬 被老公槽肥等生巨B

        45歲蔡少芬(Ada)與老公張晉結婚11年,育有8歲大女楚兒和6歲幼女信兒。月前,呢對恩愛CP以「你有咩問題」鬼馬拍片宣佈懷第3胎,現正期待小生命年尾來臨。日前下午,高齡孕媽Ada孖老公現身圓方拍拖,見住商場樓上豪宅嘅張氏夫婦有默契地戴上黑超,好有星味繞手行去cafe快閃買tea。見早前被指爆暗瘡、疑似成功追仔嘅大肚婆來回幾轉拎乳酪,之後廿四孝老公再買多袋麵包,似要谷肥愛妻,等生個金叵羅呀!

做咗幸福人妻嘅蔡少芬,分別喺11年和13年誕下重磅baby,大女楚兒出世重9.4磅;幼女信兒都有8.8磅。Ada雖然曾公開自爆10年拍《後宮甄嬛傳》時曾小產,但佢為追仔非常努力,惜多年嚟未能成功,去年揚言要「收爐」。豈料月前有驚喜,Ada開心佗第三胎,獲全城祝福。早前,大肚Ada見已進入穩定期,仲不時孖老公帶兩女周圍飛度暑假,一家四口返回重慶老家探親後,再飛轉台灣,返港又去主題樂園下水禮,絕對唔會因佗B而忽略兩位小公主。

散步買tea

   日前下午2時許,見已停工留港陪妻安胎嘅張晉陪愛妻現身圓方。兩公婆有默契地戴上黑超,一身便裝仍好有星味咁溫馨繞手落商場買tea。早排大肚Ada被影到成面爆瘡,被指疑成功追仔,搞到皮膚差。呢日見素顏嘅佢皮膚靚番晒,近睇只有幾粒淡斑,皮膚幾嫩滑!恩愛CP慢慢行去cafe買嘢,沿途被人認出,二人仍禮貌微笑回應,好nice。只見兩公婆在cafe分頭行動,張晉負責排隊;Ada就去拎3杯藍莓燕麥乳酪。畀完錢後,人妻望兩望,怕「一家五口」唔夠分,又叫丈夫拎多兩支橙汁再排隊,此時人夫order多幾個烘焙餅,怕老婆餓親。離開時,記者上前追訪張氏夫婦,孕媽怕素顏上鏡拒影相,不過就大方透露佗B生活,表示身體好好食得瞓得,又話「呢排暑假都有帶小朋友周圍去玩。」

採訪 ︰ 李維隆

hd