老公帶路首遊西葡 名媛龔嬿日夜狂食好嘢

  珠寶店兼花店太子女龔嬿(Yvonne),早前偕老公首次到葡萄牙和西班牙旅遊,她指老公婚前曾與親友去過當地好鍾意,希望婚後帶太太去一次,今次是兌現承諾。兩夫婦參觀酒莊、教堂和博物館,Yvonne表示旅程中最印象深刻是在Porto遊哈利波特書店及到只有40人居住的小島Tua遊覽。西葡兩地食物各有特色,Yvonne最喜歡當造又鮮味的沙甸魚。問到對兩地感覺?Yvonne較鍾意葡萄牙,因遊客唔算太多,可令她真正享受到當地風土人情。撰文:李佩儀

  Yvonne全程Book車遊名勝,先到葡萄牙波圖的Taylor's酒莊參加試酒tour,她坦言:「呢間酒莊好出名,我哋試咗2種紅酒同1種白酒,每位都係港幣約$200。」她還到哈利波特迷必到,有全球三大最靚書店之稱的Livraria Lello遊覽,她稱:「個書店又靚又特別,有傳《哈利波特》作者J.K.羅琳去完書店後受啟發寫咗本書出嚟。」之後她到西班牙的中世紀古城Toledo參觀天主教堂和博物館,她說:「我唔係天主教徒,但教堂真係好靚,而博物館內放有中世紀嘅武器,未見過好特別!」

  Yvonne稱兩地美食各有特色,「我好鍾意葡萄牙嘅海鮮,尤其o依家沙甸魚當造,啲魚鮮味又嫩滑,仲有當地葡撻個皮特別脆,又可加糖霜或肉桂粉;而去西班牙梗係食海鮮飯,味道香濃又足料,西班牙火腿當然必食。」首到西葡的Yvonne表示較喜歡葡萄牙,「當地唔算太多遊客,感覺無咁商業,風景又靚,同其他歐洲國家比較,可以好好享受當地風土人情。」


hd