Po性感相招兵 恨脫單 麥明詩晒曲線 甜笑密會「方面男」

  現年27歲嘅「十優港姐」麥明詩(Louisa),自從同律師男友林作分手後,曾傳出幾段緋聞,最新有指女神與已故「鋼鐵大王」龐鼎元孫兒、富三代龐榮怡(Alex)過從甚密,不過女方例牌否認。日前下午,化靚妝嘅Louisa穿上緊身白tee、大晒曲線獨自中環ifc。見守Dry多時嘅佢同個圈外「方面男」趁lunch time撐枱腳,二人不停有講有笑,笑容一致又勁冧,似足拖友甜蜜蜜呀!採訪 : 張詠森

        麥明詩2015年參選港姐奪冠入行,即被踢爆與林作相戀多年,但最終翌年分手收場。甩拖後,Louisa曾傳出幾段緋聞,但全部都係無米粥。單身多時嘅佢早前直認有追求者,更指被家人催拍拖,希望30多歲出嫁。早排,Louisa不時喺社交網誌派福利,上載養眼性感靚相,似ready有新戀情嘞!未幾,即有報道指佢與富三代龐榮怡過從甚密,Louisa否認緋聞,自言相士曾批命指佢係辛苦命,唔會嫁入豪門,但就大方表示有一、兩個追求者。

笑容一致

  日前下午1時許,Louisa單拖現身中環ifc。見化晒妝嘅佢穿上白tee牛仔褲,身材激凸好搶眼。女神沿途不停撳手機,未幾行到一間餐廳門口等咗唔夠一分鐘,一位打扮斯文、年約三十幾歲嘅「方面男」即前來會合,兩人笑笑口say hi後齊齊入座食lunch。男方雖然其貌不揚,但個樣睇落敦厚老實。兩人點餐後邊講邊笑,言談甚歡,且笑容一致幾登對。「方面男」不斷逗Louisa甜笑,女方相當受落,露出冧樣。疑似新仔見到女神甜笑,都被迷得一陣陣,托頭痴望。撐枱腳大半小時,兩人分頭走人,「方面男」似要趕返公司,即不捨say bye離開,Louisa慢慢行去服務台取泊車優惠,然後落車場取車,沿途keep住做「低頭族」send訊息,幾忙都有。

hd