上進學霸 婚後同老公分隔兩地 朱千雪幸福肥陪家人開餐

  31歲嘅朱千雪(Tracy),8月幸福出嫁,有報道話佢學業心重,仲有約半年法律博士課程,所以要同喺新加坡做醫生嘅老公仔吳昆倫(Justin)被迫分隔兩地。新婚唔夠一個月,就有指Tracy赴加拿大出席好友婚禮時,肚凸凸疑似有喜嘞!不過當事人回應「just fat」,坦白得可愛。日前周日晚上,Tracy偕父母及胞妹到太古城中菜館開餐。見身穿鬆身衫嘅佢,身形圓碌碌,連昔日長腿都變得好壯、好有肉地囉!

當年被封為「民間港姐冠軍」嘅12年港姐季軍朱千雪,甫出道即受無線力捧拍劇,不過有米Tracy好乖女,性格低調慳儉仲非常好學係學霸一名,年前回歸校園讀書,先喺中文大學修畢企業傳播管理碩士課程,之後再喺香港城市大學攻讀法律博士課程,似為未來鋪路,轉攻做「Law界女神」。感情事上,Tracy就極之專一,8月初跟青梅竹馬、拍拖5年嘅醫生男友Justin在峇里舉行浪漫婚禮。老公現於新加坡中央醫院嘅放射治療部門擔任醫生顧問,新婚Tracy就留港繼續學業,難怪早前問到造人大計,人妻都話要放埋一邊先。

個半鐘唔停口

  日前晚上7時左右,本報記者喺太古城中心發現千雪一家往中菜館dinner。當晚淡妝Tracy穿上鬆身T裇裙配波鞋,全身圓潤,仲露出粗腳仔。不過幸福肥嘅佢依舊省鏡,仲唔介意坐大廳食飯,唔怕被人認出。只見Tracy跟父親及胞妹好好傾,成餐飯未停過口,歎足個半小時才起身走人。此時,一家人行去取車仍然邊行邊傾,一時就兩姊妹雞啄唔斷;轉頭輪到兩父女有講有笑,非常融洽。最後,孝順女Tracy照顧好母親上車後,才坐上司機位,負責做司機揸車走人。

採訪 : 梁志明

hd