王梓軒狂讚女神娶得過 陳煒爆同男友未到結婚地步

  陳煒和王梓軒最近在劇集《多功能老婆》首度合作,梓軒坦言期待同煒哥拍檔已久,仲大讚煒哥是100分多功能老婆,將來搵到個有煒哥一半的對象都心足。不過問到男友陳醫生幾時有這福氣,煒哥竟自爆未到結婚這地步。兩人又提到戲中一場一鏡落的牀上戲,梓軒慘被煒哥不停擊中要害,提起都覺尷尬。 撰文:杜淑霞 攝影:李維隆 服裝:Weekend Max Mara(煒哥)、Neil Barrett(王梓軒)

  煒哥和梓軒雖然是第一次演一對,但大讚監製陳寶華的劇本令他們好易投入,煒哥說:「佢個角色官仔骨骨好有才華,真係唔使做,本身都有嗰種氣質入型入格,我好自然就有嗰份距離感。」梓軒大讚期待跟女神合作已久,「好容易投入,明益我,呢方面真係唔使演,坐底兩分鐘聽把聲都有feel啦!係難抽離啫!醫生Chan Sorry!哈哈!」

  梓軒又大讚煒哥完全符合多功能老婆條件,「最正嘅女人,唔係千依百順,係有自己追求嘅事業諗法,自己都希望自己伴侶都係咁,但係難,咁多煒哥咩!(搵到未?)搵到會同大家分享,帶畀煒哥過目(煒:見奶奶呀!)佢話有佢五成就OK!」問到煒哥男友陳國強醫生有冇呢個福氣,她就話:「我點知呀!佢都未到呢一步,我哋冇結婚計劃,o依家開心就OK!」

  講到難忘戲份,煒哥即大爆兩人有場好激的牀戲,即令梓軒個樣勁尷尬,他坦言對住女神怕羞。煒哥說:「講我哋喺牀度激烈爭辯,仲有啲動作,個拍法係一個shot落,由我入屋到牀,由頭到尾演,都幾深刻。我最叻就係,唔使度位,每次都擊中佢要害!哈哈!」問到梓軒詳情,他即大賣關子笑言:「我中到啲嘢跌晒出嚟,到時大家留意啦!」


hd