IFC外望——大隻佬直播講股萬人點播

  有股壇大隻佬之稱嘅郭思治(見圖),過檔中資行民眾證券出任董事總經理,仲搞埋直播分析股市,連佢啲名嘴老友都話會拔刀相助,出鏡同大家講吓股,實行開齊廣東話及普通話台。

  郭Sir話現在做股票分析,要北望神州,好似剛過去嘅星期六,佢喺深圳與中投合辦網上講座,點擊及看過他直播嘅就有23萬人次,而睇足全程嘅更有56000人,當中仲有互動,真係好有滿足感。

  佢話由於月初先上班,比較忙,最慘係忙到連健身時間都無乜,因為佢每日起碼要用超過2個小時健身。好彩現時都仲有六舊腹肌,咪睇少呢六舊腹肌,佢話每日要做2000下Sit up,相信香港每日做Sit up嘅人,都無人夠佢咁多。

  年幾前佢又開始練詠春,佢話廿零歲時練過一年,之後停咗,但隨著近幾年《葉問》電影大熱,睇睇下又燃起佢心中果團火,於是年幾前再從頭學過,佢謙稱無得同國藝娛樂老闆冼國林比,仲比喻自己係小學三年班,而冼國林已經係大學程度。不過,兩個人嘅師傅均師承詠春大師葉問,都係同輩師兄弟。

雅虎靚CEO袋六億離職補償

  雅虎日前詳細披露美女行政總裁邁耶,會攞到2300萬美元(約1.79億港元)嘅離職補償,仲未計近290萬股雅虎認股權,按市價計值5680萬美元(約4.43億港元),加埋超過6億港元,呢個確實係「黃金降落傘」呀!

  邁耶2012年由Google過檔雅虎擔任行政總裁,但幾年落嚟始終無法扭轉雅虎虧損嘅命運,仲爆出兩宗曾被黑客入侵盜取資料嘅醜聞,搞到臨門一腳都要減價超過27億港元,至成功將核心業務賣出畀Verizon。

  邁耶話會繼續留低喺雅虎,見證雅虎嘅核心如何融合Verizon,至於佢坐唔坐得返CEO個位,就要睇Verizon嘅後續發展。至於完成交易後改名做Altaba嘅雅虎原公司,就真係待邁耶不薄,送咁大筆離職補償過佢。

高瞻

hd