Advertisement

IFC外望——內地前首富獄中不忘買磚頭

  做過吓中國首富嘅國美創辦人兼大股東黃光裕,雖然喺內地做緊獄中龍,但依然活躍商界投資,日前就有外電話佢同夫人杜鵑買咗喺紐約東76大街7號嘅一棟豪宅,成交價4150萬美元(約3.24億港元),睇嚟鐵窗生涯絲毫冇磨損佢投資嘅熱情!

三億幾入手紐約豪宅

  據《紐約郵報》星期二報道,黃光裕入手嘅呢棟豪宅係名為Clarence Whitman Mansion嘅1.4萬平方英尺聯排別墅,放盤人係日本富豪,最初放盤價係5000萬美元,到今年1月再放盤時變咗4500萬美元。而黃光裕夫婦入手價係4150萬美元,相當於是每平方英尺成交價近3000美元(約2.34萬港元)。

  呢棟樓高6層嘅新文藝復興時代風格嘅別墅,有119年歷史,係19世紀嘅建築,可以話係古董屋,有9間睡房同埋私家升降機,認真夠豪。

  老美嘅報道話,黃氏夫婦利用一間有限公司買入呢棟別墅。不過,美國司法部正嚴查交易有無涉及洗錢等問題!

摩通預言騰訊三年升78%

  股王騰訊(700)敢唔敢估頂?如果投資者看到證券大行報告,可能真係唔敢估頂!摩通發表最「牛」預言,睇好內地 FinTech發展,唱好股王騰訊三年飆78%,股價高見382蚊,昨日收市價係214.6元。其實又唔係好難嘅事,騰訊3年前分拆完都係100元多些,眨下眼已經去到兩百幾元,過去未夠三年已經升超過100%。咁如果你係一個長情嘅股東,由騰訊上市揸到宜家,前後都未夠13年,一手已經賺咗過百萬。即當年拎十萬元出來買騰訊,今時今日完全可以炒老闆魷魚唔使做。

  摩通預計,內地FinTech行業每年會有44%增長,至2020年,整體收入將達到4600億元人民幣。當中,阿里巴巴及騰訊將合共取得內地金融科技行業整體市佔率50%至60%,兩者市值於2020年前料分別增加3260億美元及3910億美元。倘投資者考慮到兩間公司在金融科技方面的增長潛力,摩通料阿里及騰訊股價,未來分別會有65%及78%上升空間。

高瞻

hd