Advertisement

IFC外望——平保A疑遭惡意沽空 上交所即時「問責」

  股民如果記性唔差,應該記得前年年中內地A股暴挫,引起監管機構甚至執法機關調查惡意沽空。噚日內地股市又出現疑似惡意沽貨,受害股份還包括香港股民愛股平保(2318)。噚日下午2時28分,距離A股收市只剩約半小時,平保A股、興業銀行突然急插,平保多次出現2萬手以上的沽盤,兩分鐘內成交額逾5億元人民幣,興業銀行盤中的沽盤也超逾10萬手。

  邊個係呢場惡意沽貨嘅始作俑者?上交所實時監察系統就盯上一家證券公司嘅資管計劃,上交所預告,將直接約談有關負責人,查個水落石出,後續的情況如何,大家等待上交所約談後直接點名問責,到底是誰肆意炒作?

  兩隻重磅金融股出現反常的「深V」走勢,一度勁跌4%及7%,但隨後快速收復失地。兩隻股份成交額各為23.9億元及16.96億元。

  收市後,上交所發出公告,通過實時系統關注到某券商資管計劃帳戶在2時28分左右,集中大量賣出平保A股,以及興業銀行股份,導致股價快速下跌。上交所立即暫停了相關帳戶當日交易,並將約談該券商負責人,進一步核查相關情況。喺內地要沽空搵食,一啲都唔易!

聯想砌低蘋果Macbook 獲選最佳手提電腦

  專門評測手提電腦嘅權威網站Laptop Mag,最近發表2017年品牌手提電腦排行榜,之前連續6年蟬聯最佳手提電腦品牌嘅蘋果Macbook,排名竟然滑落到第六,唔單止將冠軍寶座拱手讓咗比聯想,仲輸埋畀華碩、戴爾、惠普同宏碁(Acer)!

  呢個調查係訪問一眾用家心目中最佳品牌得出嘅,舊年調查仍然係冠軍嘅蘋果點解會慘跌到第6位,據講係因為MacBook Pro 2016強行淘汰眾多接口,統一改用USB-C,Macbook個價絕對唔平,但缺乏擴充介面,搞到一眾果粉要用自掏腰包,買USB-C轉換器,咁就有損形象啦!不過,Laptop Mag仍然讚蘋果嘅售後服務係最好。

  至於今年嘅冠軍聯想,Laptop Mag讚賞佢哋使用革新嘅技術同改善用家支援,所以成功奪冠。

高瞻

hd