IFC外望——創銀一姐卸任CEO惹聯想

  獅子錢莊出身、又做過恒生(011)一姐嘅梁高美懿(圖)自2012年退休後,輾轉於2014年以退休之齡加盟創興銀行(1111),並身兼執董、副主席兼董事總經理多個職銜,之後喺2016年仲做埋CEO。創銀噚日話,由今日起梁太唔再做CEO,改由本為該行執董、副董事總經理兼替任行政總裁嘅宗建新接手CEO之位,呢個安排一啲都唔出奇,打從現年50歲嘅宗建新喺2015年由工銀亞洲轉投創銀,市場已預咗有此一着,話晒梁太終有一日都要真正退休㗎!

續約一年 唔似「埋班」

  梁太喺呢個時候脫下CEO頂帽,難免令人猜想佢會否加入候任特首林鄭嘅新班子,事關梁太都有被傳可能喺下屆財爺嘅人選。

  不過創銀通告講到明,佢會仍然帶著另外「三頂帽」,而是次職位調動,好讓梁太能夠專注於督導銀行的策略發展。

  更重要玄機在於創銀嘅年報已披露,梁太與該行已續訂為期一年的服務協議,由今年2月至明年2月止,而且在新服務協議下,梁太獲加薪近10%至1280萬元,當然另有酌情花紅及其他福利。

  睇嚟即使有機會,梁太亦無意轉投官場,至於會否加入行會就要拭目以待。講開梁太薪酬,去年佢薪金係1164.8萬元,比起前年少咗1000蚊,花紅就微增3%至380萬元,加埋其他福利和袍金,薪酬總額達1632.2萬元,略加1%。

基金名人陸東加盟投融長富

  基金界名人陸東有新發展,投融長富集團(850)噚日公告天下,話請咗陸東做首席投資總監。投融長富旗下有一家擁有9號牌(資產管理)嘅附屬公司中港通資產管理,陸東自然順理成章做埋RO(負責人員)。講起陸東,韋琪真係「細細個就聽過呢個名喇」。佢做過瑞銀香港研究、策略及產品部主管,之前係保誠區域總監,早係1980年代已經係恒生銀行嘅投資主管,仲曾經6度獲得《亞洲貨幣》雜誌頒發「最佳策略員」獎項。

  陸東喺2009年自立門戶創辦基金,舊年賣盤畀投資者沈嘉奕,但仍然留任投資總監。陸東以往喺大機構任職嘅時候,多數都係睇重磅股同埋宏觀市況,但去年就改變作風,專門炒細價股以至殼股,據聞去年仲賺咗唔少。

  至於投融長富集團聽落比較陌生,公司主席李振軍喺內地經營互聯網金融,又做過廣告公司。李振軍原來早年仲做過記者,估唔到同韋琪都算係行家。

高瞻

hd