IFC外望——公司名千奇百趣 創板有壽司有AV

  今日韋琪同大家玩吓猜謎遊戲,睇吓大家單憑公司名稱估唔做到呢啲創業板公司做乜業務。第一間係叫做AV策劃推廣,日前先至申請喺創業板上市。大家千奇唔好心邪,一見到AV兩個英文字,就即刻諗咗係日本成人影片,其實呢間公司同日本成人影片一啲關係都冇,佢哋只係幫演唱會、展覽等活動做燈光及音響效果。AV策劃推廣由3兄弟一齊打理,包辦執董職位,連總經理個位都由其中一個執董嘅老婆做埋,一家人齊齊為公司出力。

  第二間公司叫做1957,呢間其實係一間餐廳,旗下有四個自家品牌,包括竹壽司、安南越南餐廳等,另有特許經營品牌權八,同芒果樹。佢哋嘅餐廳大家可能都有聽過,而公司創辦人之一兼執董可能就更多人識,就係燈光設計大師關永權。不過,間公司究竟點解叫1957,申請文件冇講,可能係創辦人的出生年份掛。

  第三間叫Cool Link,究竟有幾Cool?呢間其實係新加坡食品進出口商,而且有自家品牌銷售樽裝水,同罐頭食品。

財策師加薪跑贏大市

  臨近5月份,又係一眾大學畢業生搵工嘅季節。如果想投身金融業,搵份人工高有前景嘅工作,就要參考吓Robert Half新鮮滾熱辣發表嘅2017年薪酬指南喇!

  指南顯示,以中小企行頭嚟計,今年加薪幅度最高嘅財務和金融服務職位,係財務策劃分析師或業務經理,足足加薪11%。最低年薪都有48萬元,即閒閒哋4萬蚊一個月,最高年薪就有72萬元,係咪好吸引呢?

  另外,經歷環球金融危機後,好多金融機構都縮皮,所以能夠幫到佢哋精簡程序同大削開支而為機構增值嘅職能,好似庫務會計總監呢類職位,加薪幅度自然好過人。據指南顯示,今年庫務會計總監嘅加薪幅度達一成,最低年薪超過132萬元。聽到呢度,相信各位畢業生可以循以上方向進發啦!

高瞻

hd