Advertisement

IFC外望——百麗上市威過工行 盛百椒歎變幻太快

  除咗筍盤會俾人私有化,一代鞋王百麗(1880)喺零售市道下滑嘅情況下都要搞私有化。今年正值上市10周年嘅百麗,集團首席執行官盛百椒(左)喺記者會上,憶述公司上市時凍資仲多過工行(1398),覺得一家鞋廠做到咁都已經好威水。佢慨歎過去10年,公司曾經有好業績,到目前私有化,實在好難受。佢話公司失敗源於自己對市場變化未有正確預計,又搵唔到具體路向,唔敢大轉型,才拖延問題至今。

  佢歸納出三點公司走向私有化嘅原因:第一係錯誤估計市場對性價比嘅要求,第二係便利化嘅問題,第三係個性化嘅需要。對於種種變化,佢承認自己沒有作出正確既判斷,又話若果公司一直唔轉型,會好危險咁話。佢仲好感慨話,市場變化實在太快,公司根本追唔上。

五一生日自嘲勞碌命

  盛百椒喺記者會上仲提到自己剛剛五月一日過咗生日,今年已經65歲啦,但佢唔識開電腦,唔識用微信,對電子嘅嘢真係完全唔識,佢都唔知可以點幫公司轉型,所以都係交畀人去幫公司大轉型咁話。又笑自己話五一出世真係勞碌命!

紐國瑞典樓市爆煲風險高

  中國人鍾意買磚頭,唔少發達國家都有本港同內地人買樓嘅足跡,高盛就發表咗份報告,評估G10當中,樓市爆煲風險最高嘅排名係紐西蘭、瑞典、加拿大、澳洲同挪威。高盛話,紐西蘭樓價兩年內回調嘅機率達到40%,可能下跌5%以上!

  高盛呢份研究G10住宅市場嘅報告話,紐西蘭嘅樓價自2010以來升咗60%,當地最大城市奧克蘭平均樓價過去10年累計升咗91%,目前當地平均樓價超過100萬紐元(約536萬港元)。

  高盛係用三個重要指標嚟評估G10嘅樓價水平,包括樓價同租金比、樓價同家庭收入比,同埋經通脹調整嘅樓價。高盛指,紐國同瑞典都係移民潮同人口增長,支持本土樓市需求,同澳洲、挪威同加拿大等地樓盤供應超過人口需求又有分別。至於其餘國家樓市爆煲嘅機率,瑞典係35%、加拿大係30%,瑞士、挪威同澳洲係20%至25%。

高瞻

hd