IFC外望——寄語港商爭氣 羅兵咸料零售好到2021

  本港零售業有望出谷底!羅兵咸永道零售及消費品行業亞太區及中港主管合夥人鄭煥然(圖左)話,香港零售業今年開始會有好轉,仲話會好到2021年。佢又寄語香港零售業要生性啲,唔好好似百麗(1880)咁轉型一直又轉唔成,最後仲要被私有化,叫大家放膽進軍內地市場。

  本港零售業唔單止要面向內地,仲要向電商方面發展,調查報告發現,67%中國消費者主要購物工具就係手機,本港零售界都要積極認真咁做好網上零售,佢再三引用百麗嘅例子,叫業界要認真考慮點樣發展電商。又話香港地,好似李超人咁話,人又少地又少,點搵到咁多錢先。所以都係要認真思考點面向祖國。

  被問到香港零售業到底要喺內地做好電商定開實體店好,佢就話要兩樣一齊來,轉型就要決心加方法,唔好只係開個網上商店就算,要兩者配合,即係開網上店,又有實體店。客人網上睇完又去實體店睇吓實物,再喺網上買,咁就達到線上營銷,線上購買又可以帶動線下經營同埋線下消費。

  另外,提到庫房「水浸」,鄭煥然就話希望財爺今年可以派吓錢,俾港人開心購物,反正大家都買唔起樓。講完佢就哈哈大笑咁走,而公司嘅職員聽完都偷笑,唔知大家係咪都覺得買唔起樓而苦笑呢?

瑞銀:亞洲將爆財富繼承潮

  人類壽命愈來愈長,特別係啲大有錢佬,想佢哋死都冇咁易,君不見目前市面上俗稱「X神」、「X鱷」、「X人」嘅財主佬,個個都八張幾,仲紅光滿面添!不過話返轉頭,生老病死始終係自然規律,就算幾有錢最後都要報到,正所謂「All good things come to the end」;至於佢地啲身家咪由子孫繼承囉,又帶唔走嘅。

  瑞士銀行家族理財集團嘅亞太主管邁赫什喺「家族理財室高峰會」講,相信未來5年亞太區將出現巨額財富遺產承繼潮,超高額淨財富(最少3000萬美元流動資產),期內將有三分一轉手,佔全球同類財富15%。

  根據萊坊嘅《2017年財富報告》,去年亞洲區擁有超高額淨財富嘅有錢佬約有4.6萬人,合共坐擁4.84萬億美元(約37萬億港元)。瑞銀之前曾經講過,新興的亞洲經濟體,很快會迎來首個「大型跨代財富轉移」。

高瞻

hd