IFC外望——擁抱金融科技 蔡志堅講心唔講金講金

          尚乘集團(AMTD)與全球最大型借貸及金融科技研討會Lendit,合辦全球金融科技投資峰會,參與嘅國際企業有19家,其中包括外界注目的富途證券行政總裁鄔必偉(圖),亦有出席。尚乘集團董事長兼總裁蔡志堅與傳媒午宴,席間被問到公司致力金融科技創新,如何賺錢?蔡志堅毫不猶豫回答話:「你低估咗我們嘅情操」!

  蔡總所說嘅「情操」,是指公司一直「擁抱金融科技創新」,不單止乘着國家一帶一路政策做「超級聯繫人」,仲誓要聯繫全球金融科創企業,提供平台讓各方交流認識。蔡志堅透露,好多參加峰會嘅企業目的並非融資,甚至日後上市集資亦非其最大目標。相反,認識中國市場,了解香港金融科技環境,增強人際網終,交流技術心得等,都是吸引佢哋嘅需要和參與原因。佢更形容「好多事情是more than just money」,即不只是看錢。

  尚乘集團喺2003年時從事保險經紀、資本市場同諮詢及資產管理業務。同場嘅集團副總裁梁智勤直言,說到尾公司都係投行,當然要賺錢,但佢以「老北京」一句話相勸,「做不成生意,能做朋友嘛」!蔡志堅認為,港人有時就係太功利短視,令科技發展停滯不前。

馬斯克晒首部Model 3

  美國電動車大廠Tesla平價版Model 3嘅第一架車終於出貨啦!收貨人係創辦人兼老闆馬斯克,不過聽聞原來係公司董事艾芬普雷斯轉讓畀佢,當做佢46歲嘅生日禮物,馬斯克仲喺twitter狂晒自己架新車,各位等收貨嘅準車主唯有望梅止渴。

  據馬斯克上載佢部黑色Model 3嘅相嚟睇,據聞車身外形同之前展出嘅概念車分別不大。雖然Tesla冇正式公佈過預售定單數目,但外國媒體話超過40萬架,如果每部收1000美元訂金,咁Tesla咪已經收咗近40億美元囉!

  呢架盛惠35000美元嘅Model 3,正式出貨畀顧客嘅日子係呢個月28號,Tesla仲會舉行舞會,隆重慶祝頭30部車交貨,跟住落嚟8月同9月交貨量會加速,分別係100架同1500架,目標係到12月做到每月出廠兩萬架!

高瞻

hd