IFC外望——保監鄭慕智歎人才難求

  保監局正式運作之後,終於有機會坐低同傳媒傾吓偈。開局16日,行政總裁梁志仁就呻忙足16日,話日日都要開會商討新局嘅工作。不過,佢就覺得保監局唔再屬於政府體系,靈活度比以前高。梁志仁本身係保險業監理專員,由政府借調至保監局,出任行政總監為期一年,任期過去就要再請人。保監局主席鄭慕智(圖左四)就話現時仲物色緊人選,又慨歎要搵一個對保險熟悉、有監管經驗、且具國際保險視野兼備嘅人才唔容易。

  佢都好坦白講,始終資源有限,佢哋出嘅人工當然唔及商業機構。仲講笑話,相信肯入保監局工作嘅高級管理層都要「犧牲」,保監局唯有靠打動業界人士個心,吸引佢哋嚟應徵CEO之位!佢又指,保監局目前有180名員工,未來要增聘至300名。

  至於黃竹坑嘅新辦公室,今年底就會裝修好,之後逐步搬入去,暫時仲用緊金鐘政府合署舊保監署嘅辦公室。鄭慕智就話,考慮到某啲地區租金太貴,不能長期落腳,黃竹坑都好方便,而且已有大型保險公司搬咗入去,希望保監局嘅加入,會有帶頭作用,令黃竹坑成為保險機構集中地。

  另外,保監局執行董事(長期業務)許美瑩話,根據保險公司的數據顯示,內地人購買保險嘅保費收入正持續下降,但詳細數據需時分析,期望年底前交立法會。

東方海外闢謠 賣盤無受壓

  早前東方海外(316)公佈遭中遠海控(1919)收購,有外國傳媒指,是中央施壓,前特首董建華家族才同意賣盤,惹來「高壓」疑雲。昨日東方海外非執董、董建華妹夫金樂琦出席活動後為此事解畫,強調事實並非如此。

  金樂琦解釋,香港航運業正處於轉型階段,從前的20家大型航運企業,擁有全球80%運載力,而東方海外排名大約在中游位置。不過,近年由於行業不景氣,在多間企業併購整合之後,餘下的航運公司出路只有三種,包括成為超大型企業(即運力逾100萬個標準箱)、併購或者賣盤。

  金樂琦說,東方海外有審視不同機會,而這次賣盤,從董家的角度來說,已經是最佳選擇,因此不能說是受北京施壓才促成交易。

  至於董家成員日後會否繼續擔任管理層,他笑稱那是兩年後的事,東方海外與中遠海控早已有合作,收購後亦會帶來協同效應。

高瞻

hd