Advertisement

IFC外望——着小背心教健身 郭Sir陶傑互笠高帽

  民眾財經傳播今日開台,開台皇牌節目之一就係搵來「香港第一才子」陶傑,每個星期同大家一齊講經濟金融大事。問到點解會搵才子一齊講經濟呢,民眾財經董事總經理郭思治就話,陶傑係佢偶像,之前喺健身室見到「才子」,離好遠見到佢,就已經一路望住佢。之後陶傑又話郭Sir先係佢偶像,仲話郭Sir嗰幾舊腹肌只係可遠觀而不可褻玩,依家終於可以埋身切磋,真係三生有幸,仲係咁讚佢身型好,兩個人係咁互帶高帽。

  講到開台之後有咩睇,郭Sir話最緊要觀眾鍾意睇咩,佢哋就會做咩,盡力滿足觀眾。有「股壇大隻佬」之稱嘅郭Sir仲比大家睇佢嘅「爆肌相」,佢仲話已經拍左十集健身節目,節目裏面佢着件貼身背心。今次個台,佢話希望連唔買賣股票嘅人都會關注。另外,個台仲設有民眾財經直播App,直播App除咗全天候直播民眾財經節目外,仲特設「個人直播」功能,等分析師或網紅成為主播,但郭思治講明唔可以講政治。其後郭Sir仲話一定要多謝陳永陸(陸叔),因為過去十年,喺電台節目多得佢關照。郭Sir咁識得感恩,難怪城中咁多好朋友喺開台嘅日子都嚟捧佢場。

里昂撤出美國遭員工索償

  打工仔最緊張份糧,獎金呢啲嘢,當然係老闆話事啦,不過美國佬就唔Buy亞洲人呢套。里昂證券(CLSA)退出美國股票市場,一班被炒魷嘅員工提出法律訴訟,要追返獎金。有前員工好不滿咁表示,里昂證券對我哋咁差,咪唯有法庭見啦!

  里昂證券2月宣布退出美國股市,約有90名員工因此冇得撈,仲冇肥雞餐食,搞到員工嬲爆。呢批美國員工只獲得3個月通知期嘅薪水,即係紐約州法律規定嘅基本賠償。

  不過,佢哋仲未收到2016年嘅獎金。此外,據一名知情人士透露,部份員工亦被要求簽署放棄信件,放棄所有進一步追討嘅權利。最後搞成點,韋琪都要拭目以待,但希望可以和氣收場,話晒金融圈咁細,隨時山水有相逢。

高瞻

        

hd