IFC外望——對郭Sir台潑冷水 耀才:我哋賣專業

  所謂商場如戰場,就算係舊日拍檔同夥計,一旦各為其主,都會全力競爭無面俾,甚至擦出火花!昨日,耀才證券(1428)舉行股東會,最近唔少證券行都大搞網上財經台,民眾就由之前由耀才跳槽過去的股壇大隻佬郭思治領軍,搞咗個財經台同耀才打對台。耀才證券行政總裁許繹彬就話,唔怕對方衝擊到耀才財經台,因為公司係財經台既始祖,又話佢哋台係「賣專業」,可以贏過對方既「賣肌肉」。

  佢話,聲言「除剩半件衫」教健身的民眾財經台董事總經理郭思治(郭Sir)係「賣肌肉」,而佢哋台就係「賣專業」,相信依靠幾位分析員努力,能夠以「三個臭皮匠,勝過一個諸葛亮」,聽落火藥味都幾濃,仲隱約有隆隆炮聲O添!之後老闆葉茂林(見圖)又補充話旗下財經台比較年輕化,揶揄郭Sir係「老人家」,又話郭Sir離開耀才證券,令團隊變得更鞏固、更團結。

  至於證券行經常被人問價,葉茂林回應傳聞耀才獲得中資保險集團接觸,佢話其實一直都有投資者「叩門」接洽,但佢就表示要睇吓對方公司既背景係咪「清白」先會考慮,又話要有四叔李兆基級數既買家先會考慮喎。

璋利掛牌獲李宗偉撐場

  近期馬拉股份頻頻出現在新股市場,今首日掛牌的璋利國際(1639)又是一例,仲得到馬來西亞羽毛球王子李宗偉撐場出席上市儀式,早前公司大股東兼主席吳明璋話「會靠實力」爭取項目,能夠請來李宗偉,反映老闆人面廣。

  璋利尋日公佈招股結果,錄得逾29倍超購,並以略低過中間價的0.7元定價,上市前夕暗盤收報0.77元,較定價高10%,每手4000股,即不計手續費的入場費要2800元,集資淨額2.65億元。如果今日掛牌都能高於招股價,就唔會失禮王子。

  早前有新股分析員認為,隻股份吸引力麻麻,主要是近期盈利已有跡象放緩,公司市值達12.6億元,以一隻馬拉建築股來說,吸引力確係一般。

高瞻

hd