IFC外望——恒生一姐送年假益員工

  恒生新一姐副董事長兼行政總裁鄭慧敏(Louisa)上場個幾月即刻「派福利」。講緊係增加假期!據恒生早前內部發通告,由明年1月1日起,該行超過一半香港員工(約4500名)將可獲更多日年假,當中約六成員工(約2500名),更可獲增加4天年假。恒生話,增加有薪年假係為推動員工在工作及生活之間的平衡,同埋提升競爭力。

  恒生員工架構分8級,最高層員工係屬第1級,而最低層係第8級。當中第4、第6及第8級部分員工就係年假加得最多的一群。以第8級低層員工為例,有部分人現時有14日年假,出年就會加到18日,諗起都開心呀!而最高級別那班,即第三級或以上,如果在2011年1月1日前入職嘅員工會加到32日年假添,即係一年12個月有超過1個月係年假。

  做恒生員工真係唔錯,其他有薪假期都特別多。當中仲包括1日生日假、 14星期產假、14星期領養子女假、10日侍產假。仲有2日義工假、5日公職假(供因公職,如香港輔助警察隊、醫療輔助隊及民安隊等,須接受入營訓練的員工享用)及4日考試假添。嘩,恒生呢個僱主夠晒體貼員工,韋琪最想呢篇文係我老闆睇到啦!

賈躍亭抵港「度水」無人應

  內地傳媒引述消息指,樂視創辦人賈躍亭已抵香港,開始約見投資者,雖然唔知佢老哥係咪來香港撲水,但在港的中資財團幾乎都避而不見。

  去年11月,賈躍亭訪港及與多家中資財團會面,以求解決當時困境。今次賈躍亭再度來港「撲水」,但是今時不同往日,因賈躍亭內地資產被凍結,他個人又背負多項連擔保的負債。在北京的樂視大廈,追債的供應商已包圍大廈一段時間,但追債仍未有結果。

  有大型的中資財團人士話,幾乎所有人都在避開參與樂視的項目。而且,隨著內地金融機構審核愈來愈嚴格,在港中資機構的海外資金也不算寬裕,故也得謹慎。他直言,「要找到支持賈躍亭的香港財團不容易,畢竟他的個人信用已經透支。」

高瞻

hd