IFC外望——滙豐搞設計App比賽 保障網絡安全

  滙豐為打擊金融罪行,特別設有「HSBC Safeguard」一項全球計畫。噚日就高調宣傳搞個應用程式比賽,邀請大專生和初創企業參與設計比賽。滙豐香港區一姐施穎茵話,最新、最準確嘅資料係銀行杜絕不法分子入侵金融體系嘅重要武器,該行希望借助參賽者嘅創意思維,設計出簡便嘅方式,收集客戶最新資料。

  滙豐出咗兩項難題作為參賽者嘅挑戰,一係個人客戶層面,由於客戶資料時有變動,但銀行未必及時知道,令到銀行喺未取得客戶最新資料情況下,喺驗證交易同發出提示訊息都會遇到困難,而難題就係如何喺客戶同意下,利用科技令銀行嘅客戶資料紀錄同步更新?

  第二個挑戰就喺商業客戶層面,因銀行以傳統方式聯絡客戶未必經常有效,尤其客戶身在外地,所以難題係如何令銀行能識別出客戶機構內嘅關鍵人士,無論對方身在何處,都能聯絡得上?參賽者可二揀一或者兩條全選。雖然難題一樣,但大專生同初創企業兩個參賽組別嘅勝出者獎金就有分別,大專生組別冠、亞、季軍獎金分別為10萬、5萬及3萬,初創企業獎金則分別有30萬、10萬及5萬。如果到時大專生嘅方案仲好過初創企業,似乎獎金安排就唔太公道。滙豐就解釋,由於初創企業有資本開支,所以有咁嘅安排。睇嚟滙豐都好體諒初創企業喎!

三星「碌八」預售創新高

  南韓大牌三星電子上星期推新旗艦手機Galaxy Note 8,噚日傳出喜訊,話佢哋頭5日已經收到39.5萬部嘅預售定單,創咗Note系列歷來新高紀錄,仲一洗舊年因為Note 7熱到爆炸引發嘅連串回收等頹氣,威返次囉。

  三星流動通訊事業部總裁高東真話,呢部手機自從8月23日喺紐約亮相以來,來自約40個國家嘅預售定單顯示,初步市場反應非常好。

  自從發生Note 7「起火」事件,三星為咗挽回消費者嘅信心,呢部Note 8可以講係捍衛市場份額嘅「背水一戰」,現時預售咁好,應該飲得杯落啦!

  呢部新機喺美國定價930至960美元(約7500港元樓下),呢個禮拜五喺美國同南韓有得賣,香港就要等到29號喎!未揸定主意嘅朋友,可以睇埋星期三凌晨發布嘅新iPhone,先至決定換邊部新機。

高瞻

hd