IFC外望——泡菜版Bitcoin勁升15倍

  前排內地同韓國相繼禁止歐美科網界熱捧嘅首次代幣發行(ICO),比特幣一度插水,但日韓嘅粉絲似乎心口寫咗個勇字咁,繼續炒作。韓國第一個虛擬貨幣BOScoin喺呢個月1日正式發行,市值已經去到約6000億韓圜(約43億港元),聞說早期投資者賺咗15倍咁多。

  呢個BOScoin係由開發商Block Chain喺5月進行ICO,佢哋話,參與發行嘅投資者已經喺上月底首個區塊鏈啟動時收到貨幣。

  BOScoin完成開發嘅消息一出,價格已經由0.8美元升到1.6美元。BOScoin嘅ICO價原來60韓圜(約5美仙),計起上嚟,早期投資者咪賺咗超過15倍囉!

  不過比特幣個勢頭都唔弱,最近因為芝加哥商交所推比特幣期貨而返生,一個月左右就由4500美元一枝箭咁飆到7400美元,只能講一句:點到你唔服!

《壹週刊》賣盤交易再延期

  壹傳媒(282)出售香港、台灣《壹週刊》等雜誌業務的交易,可以話係一波三折。這宗交易原本已經要延遲到10月31日先至完成,但10月已過,遲遲未有聲氣。壹傳媒昨晚終於再發通告,表示收到買家黃浩的通知,希望將交易完成日期延遲至本月21日。壹傳媒又話,如果交易有何進一步重大發展,會再出通告。

  壹傳媒在今年7月,宣佈出售港台兩地《壹週刊》連同多份雜誌業務給商人黃浩,作價3.2億元,黃浩仲要向該等業務注資1.8億元。現時《壹週刊》的日常營運,已經由黃浩委派的團隊接手,但交易遲遲未完成,事件最終點發展,仲要拭目以待。

  今年9月底,壹傳媒已經將交易的截止日期,由10月5日延長至31日,當日的通告並指出,將初步保證金由4000萬元增加至6000萬元,而黃浩作為買方,要向壹傳媒償付該等業務的經營虧損,上限為每月500萬元。至於昨晚的通告,則沒有提及再次延期之後,交易條款有沒有改變。

  壹傳媒近期不利消息甚多,上周發出盈警,預告虧損擴大,股價昨天下跌9.4%,收市報0.48元。

高瞻

hd