IFC外望——主席唔易做 羅康瑞呻冇時間陪老婆

  向來係大忙人嘅貿發局主席羅康瑞飛到馬來西亞,出席該局搞嘅「In style」商貿論壇活動。

  見到記者都忍唔住呻咗兩句,話貿發局主席呢份工唔易做,因為最近要全情投入香港在一帶一路發展,搞到無晒時間,連太太朱玲玲都「詐晒型」,所以難得來到馬來西亞公幹,當然想帶埋老婆一齊,工作之餘仲可以當去吓旅行。可惜,好事多磨,最終呢位被譽為「最美麗的香港小姐」都係去唔成大馬。

  今次活動嘅晚宴仲有個「花生騷」,係有名的設計師設計一系列晚裝,羅康瑞話老婆好有興趣欣賞,可惜佢話老婆大人在香港機場check in時,因為護照問題未能成行。

  唔係嘛!又因為護照過期?羅康瑞話今次唔係過期,而係本護照唔夠用!因為航空公司職員發現朱玲玲本護照剩返一頁,根據馬來西亞入境條款係唔容許,就算去到都唔畀入境,咁朱玲玲只好折返,搞到羅康瑞不知幾失望。所以盧駿在此奉勸各位旅遊達人同富豪太太,若經常出遊,除留意護照有效期,仲要留意夠唔夠頁數蓋出入境印!

  記者見到羅康瑞就自然想知家族爭產最新情況,佢就即刻話唔想講呢啲傷心事,但就話已經好少見羅老太啦,因為依家見佢都有難度,佢仲好醒目立即轉返話題到一帶一路,仲話最近連發夢都夢見一帶一路的機遇,對香港帶來莫大好處添。

  連瞓覺都不忘貿發局嘅工作,咁上心,貿發局搵到呢位主席幫手真係無得彈啦。

微信支付信用卡還款將徵費

  微信支付宣佈,由下個月1日起將對微信支付信用卡還款的用戶徵收手續費,即向每個用戶每月累計信用卡還款額超出5000元(人民幣,下同)的部份金額,收取0.1%手續費,最少收0.1元,5000元以內還款額則免手續費。

  同一身份證下的多個微信帳戶,每月共享5000元的免手續費額度。至於徵收手續費細則方面,手續費的金額計算精確至小數點後兩個位,最低收費為0.1元。另外,用戶進行還款操作時,手續費與還款金額一同支付。

  微信支付同時推出手續費減免活動,在新措施實施第一個月,每人每月累計還款額2萬元或以下,手續費可獲全部減免。

  微信支付早於2015年10月,已開始徵收轉帳費,每人每月享有2萬元免費轉帳額度,超出2萬元的金額,會按0.1%的標準收取手續費,收款者則不需繳付手續費。

高瞻

hd