IFC外望——平保中心高科技 升降機下降可發電

  香港在科技創新及金融科技上不斷努力,但跟中國內地相比真係要再加把勁。遠的不說,只說近鄰的深圳已晉身為中國第一科技創新城市,係香港好好學習對象。深圳福田的平安國際金融中心樓高118層,係全中國第二高大樓,不但「身高」而且科技含量水平亦很高,就連升降機都可以在運行當中產生電力,再用來做大廈冷卻系統,十分環保。

  香港藍籌股平安保險在深圳的總部就坐落在平安國金中心,平保高層昨日招待韋琪一行傳媒工作者參觀,以及簡介未來業務發展,韋琪才發覺雖然自己係平保小股東,其實對平保了解唔夠,尤其是平保在科技及金融科技上的發展,真係令韋琪大開眼界,仲對佢未來在醫療保險、智慧城市等發展有深刻印象。當踏入大廈,要坐高速升降機在一分鐘內升上111樓,本來都有小小擔心,但搭乘後又覺得好平穩寧靜。據講,這座大廈還運用了許多高科技,不但防風防八至九級地震,更係環保產物。韋琪剛坐完的升降機,在下降時會產生電力,而電力儲存後會在夜間在地庫層製冰,而冰反過來就用作大廈冷卻系統,真係可以做到循環節省能源,減低碳排放。

鎬銀創富推數碼貨幣平台

  近期比特幣(Bitcoin)炒到飛起,近日更升穿7000美元,香港忽然間亦多咗呢類虛擬貨幣嘅交易平台推出,好似鎬銀創富昨日就公佈推出多幣數碼資產交易平台,主席陳禎和話數碼貨幣宜家正逐步進入主流投資市場,而佢哋嘅交易平台喺今個月中就會將以太幣(Ethereum)上架,月內計埋以太幣將會有3種數碼貨幣可以喺平台上交易。佢仲話今年嘅目標是係希望平台實現每天5000萬美元的交投量。

  今次嘅發布會同平時有啲唔同,眼見現場有好多揸著LV袋嘅大媽撐場,估計都有五、六十個,其中一位紅衣大媽仲好熱情咁同行政總裁黃偉斌打招呼,之後仲送上飛吻一個。除咗大媽,現場仲有好幾位南亞裔人士。另外喺樓下,又有自稱係苦主嘅人話來討債,而且警察出動埋,場面都幾精采!

高瞻

hd